Punjab Congress ਦਾ Poster War! ਕੌਣ ਕਰ ਰਿਹਾ ਪਾਰਟੀ ਦਾ ਮਾਹੌਲ ਖ਼ਰਾਬ?

ਕਾਂਗਰਸ ਧੜੇਬੰਦੀ ਦਾ ਰੌਲਾ ਬੰਦ ਕਮਰਿਆਂ ਤੇ ਪਾਰਟੀ ਮੀਟਿੰਗਾਂ ਤੋਂ ਹੁੰਦਾ ਹੋਇਆ ਸੜਕਾਂ ‘ਤੇ ਪਹੁੰਚ ਗਿਆ ਹੈ।

ਪੰਜਾਬ ਕਾਂਗਰਸ ਵਿਧਾਨ ਸਭਾ ਚੋਣਾਂ 2027 ਦੀਆਂ ਤਿਆਰੀਆਂ ‘ਚ ਜੁੱਟੀ ਹੋਈ ਹੈ। ਪੰਜਾਬ ਕਾਂਗਰਸ ਇੰਚਾਰਜ ਭੂਪੇਸ਼ ਬਘੇਲ ਪੰਜਾਬ ਦੇ ਦੌਰੇ ਤੇ ਹਨ। ਬਘੇਲ ਤੇ ਪੰਜਾਬ ਕਾਂਗਰਸ ਪ੍ਰਧਾਨ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਦੀ ਅਗਵਾਈ ‘ਚ ਵੱਖ-ਵੱਖ ਹਲਕਿਆਂ ‘ਚ ‘ਹਰ ਬੂਥ ਕਾਂਗਰਸ ਮਜ਼ਬੂਤ’ ਮੁਹਿੰਮ ਚਲਾਈ ਜਾ ਰਹੀ ਹੈ। ਪੰਜਾਬ ਕਾਂਗਰਸ ਲੀਡਰਸ਼ਿਪ ਵੱਲੋਂ ਅੰਦਰੂਨੀ ਧੜੇਬੰਦੀ ਨੂੰ ਪਿੱਛੇ ਰੱਖ ਕੇ ਸੰਗਠਨ ਨੂੰ ਮਜ਼ਬੂਤ ਕਰਨ ਤੇ ਚੋਣ ਮੁਹਿੰਮ ‘ਤੇ ਫੋਕਸ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ। ਪਰ ਬੀਤੇ ਦਿਨਾਂ ਦੇ ਘਟਨਾਕ੍ਰਮ ਤੋਂ ਚੋਣ ਮੁਹਿੰਮ ਤੋਂ ਜ਼ਿਆਦਾ ਕਾਂਗਰਸ ਦੇ ਕਲੇਸ਼ ਦੀ ਚਰਚਾ ਹੋ ਰਹੀ ਹੈ। ਚੋਣ ਮੁਹਿੰਮ ‘ਚ ਜਿੱਥੇ ਕਾਂਗਰਸ ਆਪਣੇ ਵਰਕਰਾਂ ‘ਚ ਉਤਸ਼ਾਹ ਭਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ, ਪਰ ਇਸੇ ਵਿਚਕਾਰ ਮੀਟਿੰਗਾਂ ‘ਚ ਹੋ ਰਹੇ ਹੰਗਾਮਾ ਕਾਂਗਰਸ ਲਈ ਸਿਰ ਦਰਦ ਬਣ ਚੁੱਕਿਆ ਹੈ।

ਹੁਣ, ਇਹ ਕਾਂਗਰਸ ਧੜੇਬੰਦੀ ਦਾ ਰੌਲਾ ਬੰਦ ਕਮਰਿਆਂ ਤੇ ਪਾਰਟੀ ਮੀਟਿੰਗਾਂ ਤੋਂ ਹੁੰਦਾ ਹੋਇਆ ਸੜਕਾਂ ‘ਤੇ ਪਹੁੰਚ ਗਿਆ ਹੈ। ਪਹਿਲਾਂ ਜਿੱਥੇ ਵੜਿੰਗ ਤੇ ਬਘੇਲ ਦੀ ਅਗਵਾਈ ‘ਚ ਚੱਲ ਰਹੀ ਚੋਣ ਮੁਹਿੰਮ ‘ਚ ਸਾਬਕਾ ਮੁੱਖ ਮੰਤਰੀ ਤੇ ਮੌਜੂਦਾ ਸਾਂਸਦ ਚਰਨਜੀਤ ਸਿੰਘ ਚੰਨੀ ਦੇ ਸਮਰਥਕ ‘ਚੰਨੀ ਜ਼ਿੰਦਾਬਾਦ’ ਤੇ ‘ਚੰਨੀ ਲਿਆਓ, ਕਾਂਗਰਸ ਬਚਾਓ’ ਦੇ ਨਾਅਰੇ ਲਗਾ ਰਹੇ ਸਨ। ਹੁਣ ਇਹ ਵੜਿੰਗ ਬਨਾਮ ਚੰਨੀ ਵਿਵਾਦ ਸੜਕਾਂ ‘ਤੇ ਪਹੁੰਚ ਚੁੱਕਾ ਹੈ।

ਕਾਂਗਰਸ ਦਾ ਪੋਸਟਰ ਵਾਰ

ਦਰਅਸਲ, ਬੀਤੇ ਦਿਨ ਮੁਕਤਸਰ ਤੇ ਫਿਰੋਜ਼ਪੁਰ ਦੀਆਂ ਸੜਕਾਂ ‘ਤੇ ‘ਕਾਂਗਰਸ ਦਾ ਪੋਸਟਰ ਵਾਰ’ ਦੇਖਿਆ ਗਿਆ। ਮੁਕਤਸਰ ਚ ਲੱਗੇ ਪੋਸਟਰਾਂ ਚ ਭੂਪੇਸ਼ ਬਘੇਲ ਨੂੰ ਬ੍ਰਿਟਿਸ਼ ਰਾਜ ਦੇ ਅਧਿਕਾਰੀ ਦੀ ਵਰਦੀ ਚ ਦਰਸਾਇਆ ਗਿਆ ਹੈ ਤੇ ਥੱਲੇ Go Back Baghel ਲਿਖਿਆ ਗਿਆ। ਇਹ ਪੋਸਟਰ ਆਜ਼ਾਦੀ ਤੋਂ ਪਹਿਲਾਂ Simon Go Back ਅੰਦੋਲਨ ਦੀ ਤਰਜ਼ ਤੇ ਤਿਆਰ ਕੀਤੇ ਗਏ ਸਨ।

 ਮੁਕਤਸਰ ‘ਚ ਲੱਗੇ ਪੋਸਟਰ

ਇਸ ਦੇ ਨਾਲ ਹੀ ਸਾਬਕਾ ਮੁੱਖ ਮੰਤਰੀ ਦੇ ਮੌਜੂਦਾ ਸਾਂਸਦ ਚਰਨਜੀਤ ਸਿੰਘ ਚੰਨੀ ਦੇ ਸਮਰਥਨ ਚ ਵੀ ਕਈ ਪੋਸਟਰ ਲਗਾਏ ਗਏ ਸਨ। ਇੱਕ ਪੋਸਟਰ ਤੇ ਰਾਜਾ-ਬਘੇਲ ਹਟਾਓ, ਕਾਂਗਰਸ ਬਚਾਓ ਦਾ ਨਾਅਰਾ ਲਿਖਿਆ ਹੋਇਆ ਸੀ, ਜਦਕਿ ਦੂਜੇ ਪੋਸਟਰ ਚ ਰਾਹੁਲ ਗਾਂਧੀ ਜੀ ਸੁਣੋ ਪੰਜਾਬੀਆਂ ਦੀ ਪੁਕਾਰ, ਲਿਆਓ ਚੰਨੀ ਬਣਾਈਏ ਕਾਂਗਰਸ ਦੀ ਸਰਕਾਰ ਲਿਖਿਆ ਹੋਇਆ ਹੈ।

ਫਿਰੋਜ਼ਪੁਰ ‘ਚ ਵੀ ਪੋਸਟਰ ਵਾਰ, ਪਰ ਇਸ ਵਾਰ ਚੰਨੀ ਦਾ ਵਿਰੋਧ

ਬੀਤੀ ਸ਼ਾਮ ਹੁੰਦੇ-ਹੁੰਦੇ ਫਿਰੋਜ਼ਪੁਰ ‘ਚ ਵੀ ਇਹ ਪੋਸਟਰ ਵਾਰ ਦੇਖਿਆ ਗਿਆ। ਹਾਲਾਂਕਿ, ਇਸ ਵਾਰ ਚੰਨੀ ਦੇ ਹੱਕ ‘ਚ ਨਹੀਂ, ਸਗੋਂ ਚੰਨੀ ਦੇ ਖਿਲਾਫ਼ ਪੋਸਟਰ ਲੱਗੇ ਦੇਖੇ ਗਏ। ਸ਼ਹਿਰ ‘ਚ ਚਰਨਜੀਤ ਸਿੰਘ ਚੰਨੀ ਨੂੰ ਨਿਸ਼ਾਨਾ ਬਣਾਉਂਦੇ ਵਿਵਾਦਤ ਪੋਸਟਰ ਲੱਗੇ ਨਜ਼ਰ ਆਏ। ਪੋਸਟਰ ‘ਚ ਚੰਨੀ ਦੀ ਤਸਵੀਰ ਨੂੰ RSS ਲਿਖੀ ਟੀ-ਸ਼ਰਟ ‘ਚ ਦਰਸਾਇਆ ਗਿਆ ਹੈ, ਜਦਕਿ ਉੱਪਰ ਵੱਡੇ ਅੱਖਰਾਂ ‘ਚ ਲਿਖਿਆ ਹੈ- ‘ਚੰਨੀ ਭਜਾਓ ਕਾਂਗਰਸ ਬਚਾਓ’।’ ਫਿਰੋਜ਼ਪੁਰ ਸ਼ਹਿਰ ਦੇ ਵੱਖ-ਵੱਖ ਥਾਵਾਂ ਦੇ ਉੱਪਰ ਇਹ ਪੋਸਟਰ ਲੱਗੇ ਨਜ਼ਰ ਆਏ।

 ਫਿਰੋਜ਼ਪੁਰ ‘ਚ ਲੱਗਾ ਪੋਸਟਰ

ਪੋਸਟਰਾਂ ਪਿੱਛੇ ਕੌਣ?

ਇਹ ਪੋਸਟਰ ਕਿਸ ਨੇ ਲਗਾਏ, ਇਸ ਦੇ ਪਿੱਛੇ ਕੌਣ ਹੈ ਅਤੇ ਇਸ ਦਾ ਮਕਸਦ ਕੀ ਹੈ, ਇਸ ਬਾਰੇ ਅਜੇ ਤੱਕ ਕੋਈ ਅਧਿਕਾਰਿਕ ਜਾਣਕਾਰੀ ਸਾਹਮਣੇ ਨਹੀਂ ਆਈ। ਪਰ ਇੱਕ ਗੱਲ ਸਾਫ਼ ਹੈ ਕਿ ਇਨ੍ਹਾਂ ਪੋਸਟਰਾਂ ਨੇ ਕਾਂਗਰਸ ਦੀ ਅੰਦਰੂਨੀ ਸਿਆਸਤ ਨੂੰ ਲੈ ਕੇ ਨਵੀਂ ਚਰਚਾ ਛੇੜ ਦਿੱਤੀ ਹੈ। ਹੁਣ ਦੇਖਣਾ ਇਹ ਹੋਵੇਗਾ ਕਿ ਕੀ ਕਾਂਗਰਸ ਹਾਈਕਮਾਨ ਜਾਂ ਚਰਨਜੀਤ ਸਿੰਘ ਚੰਨੀ ਇਸ ਪੋਸਟਰਬਾਜ਼ੀ ਤੇ ਕੋਈ ਪ੍ਰਤੀਕਿਰਿਆ ਦਿੰਦੇ ਹਨ ਜਾਂ ਨਹੀਂ।

ਚੰਨੀ ਦੀ ਨਾਰਾਜ਼ਗੀ ਤੇ ਸਸਪੈਂਸ ਬਰਕਰਾਰ

ਇਸ ਦੌਰਾਨ ਚਰਨਜੀਤ ਸਿੰਘ ਚੰਨੀ ਦੀ ਪਾਰਟੀ ਲੀਡਰਸ਼ਿਪ ਨਾਲ ਵਧ ਰਹੀ ਦੂਰੀ ਵੀ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ। ਪੰਜਾਬ ਦੌਰੇ ਤੇ ਆਏ ਭੂਪੇਸ਼ ਬਘੇਲ ਵੱਲੋਂ ਚੰਨੀ ਨਾਲ ਮੁਲਾਕਾਤ ਨਾ ਕਰਨ ਤੇ ਚੰਨੀ ਵੱਲੋਂ ਪਾਰਟੀ ਦੇ ਪ੍ਰੋਗਰਾਮਾਂ ਤੋਂ ਦੂਰੀ ਬਣਾਈ ਰੱਖਣ ਕਾਰਨ ਸਿਆਸੀ ਅਟਕਲਾਂ ਤੇਜ਼ ਹੋ ਗਈਆਂ ਹਨ। ਦੱਸ ਦੇਈਏ ਕਿ ਚੰਨੀ ਧੜਾ, ਰਾਜਾ ਵੜਿੰਗ ਨੂੰ ਪੰਜਾਬ ਕਾਂਗਰਸ ਪ੍ਰਧਾਨ ਅਹੁਦੇ ‘ਤੇ ਬਰਕਰਾਰ ਰੱਖਣ ਨਾਲ ਖੁਸ਼ ਨਹੀਂ ਹੈ। ਚੰਨੀ ਨੂੰ ਹੋਰ ਵੀ ਸੀਨੀਅਰ ਆਗੂਆਂ ਦਾ ਸਾਥ ਮਿਲ ਚੁੱਕਿਆ ਹੈ।