ਪੰਜਾਬ BJP ਨੇ ਸੀਐਮ ਭਗਵੰਤ ਮਾਨ ਦੀ ਇੱਕ AI ਵੀਡੀਓ ਜਾਰੀ ਕੀਤੀ ਹੈ, ਜਿਸ ਤੋਂ ਬਾਅਦ ਸੂਬੇ ਵਿੱਚ ਸਿਆਸੀ ਘਮਾਸਾਨ ਸ਼ੁਰੂ ਹੋ ਗਿਆ ਹੈ।
ਪੰਜਾਬ ‘ਚ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਨੇ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਇੱਕ AI ਜਨਰੇਟਿਡ ਵੀਡੀਓ ਜਾਰੀ ਕੀਤੀ ਹੈ, ਜਿਸ ‘ਚ ਉਨ੍ਹਾਂ ਦੇ ਇੱਕ ਸਕੂਲ ਦੇ ਅੰਦਰ ਥੱਪੜ ਮਾਰਦੇ ਹੋਏ ਦਿਖਾਇਆ ਗਿਆ ਹੈ। ਵੀਡੀਓ ਜਾਰੀ ਹੋਣ ਤੋਂ ਬਾਅਦ ਪੰਜਾਬ ‘ਚ ਸਿਆਸੀ ਬਵਾਲ ਮਚ ਗਿਆ ਹੈ। ਵੀਡੀਓ ‘ਚ ਦਿਖਾਇਆ ਗਿਆ ਹੈ ਕਿ ਇੱਕ ਅਧਿਆਪਕ ਸਕੂਲ ‘ਚ ਪੜ੍ਹਾ ਰਿਹਾ ਹੈ ਤੇ ਬੋਰਡ ਤੇ Vegetable (ਸਬਜ਼ੀਆਂ) ਤੇ Deer (ਹਿਰਨ) ਦੇ ਗਲਤ ਸਪੈਲਿੰਗ ਲਿਖੇ ਹੋਏ ਹਨ। ਅਧਿਆਪਕ ਬੱਚਿਆਂ ਨੂੰ ਵੀ ਇਹ ਗਲਤ ਸਪੈਲਿੰਗ ਆਪਣੀਆਂ ਕਾਪੀਆਂ ‘ਚ ਲਿਖਣ ਲਈ ਕਹਿੰਦਾ ਹੈ। ਇਹ ਵੀਡੀਓ ਭਾਜਪਾ ਵੱਲੋਂ ਪੰਜਾਬ ਸਰਕਾਰ ਦੇ ਸਿੱਖਿਆ ਮਾਡਲ ‘ਤੇ ਸਵਾਲ ਚੁੱਕਣ ਲਈ ਜਾਰੀ ਕੀਤੀ ਗਈ ਹੈ।
49 ਸਕਿੰਟ ਦੀ AI ਜਨਰੇਟਿਡ ਵੀਡੀਓ ਜਾਰੀ
ਦਰਅਸਲ, ਪੰਜਾਬ ਭਾਜਪਾ ਵੱਲੋਂ 49 ਸਕਿੰਟ ਦੀ AI ਨਾਲ ਤਿਆਰ ਕੀਤੀ ਗਈ ਵੀਡੀਓ ਜਾਰੀ ਕੀਤੀ ਗਈ ਹੈ। ਵੀਡੀਓ ਦੀ ਸ਼ੁਰੂਆਤ ਇੱਕ ਸਕੂਲ ਦੇ ਕਲਾਸਰੂਮ ਤੋਂ ਹੁੰਦੀ ਹੈ। ਇਸ ‘ਚ AAP ਸੁਪਰੀਮੋ ਅਰਵਿੰਦ ਕੇਜਰੀਵਾਲ ਤੇ ਸਿੱਖਿਆ ਮੰਤਰੀ ਹਰਜੋਤ ਸਿੰਘ ਬੈਂਸ ਕਲਾਸਰੂਮ ਦੇ ਬਾਹਰ ਖੜ੍ਹੇ ਦਿਖਾਈ ਦਿੰਦੇ ਹਨ। ਕਲਾਸਰੂਮ ਦੇ ਅੰਦਰ ਇੱਕ ਪੋਸਟਰ ਲੱਗਾ ਹੈ, ਜਿਸ ‘ਚ Vegetables ਦੀ ਥਾਂ Vegitables ਤੇ Deer ਦੀ ਥਾਂ Dear ਲਿਖਿਆ ਦਿਖਾਇਆ ਗਿਆ ਹੈ।
ਇਸ ਤੋਂ ਬਾਅਦ ਵੀਡੀਓ ‘ਚ ਆਵਾਜ਼ ਆਉਂਦੀ ਹੈ, ‘ਗਲਤੀ ਇੱਕ ਪੋਸਟਰ ਵਿੱਚ ਹੁੰਦੀ ਤਾਂ ਮਿਟਾ ਦਿੰਦੇ, ਪਰ ਉਹੀ ਗਲਤੀ ਜੇਕਰ ਬੱਚੇ ਦੇ ਦਿਮਾਗ ‘ਚ ਲਿਖ ਦਿੱਤੀ ਜਾਵੇ ਤਾਂ ਉਸਦਾ ਨੁਕਸਾਨ ਕੌਣ ਮਿਟਾਏਗਾ?’ ਇਸ ਤੋਂ ਬਾਅਦ ਭਗਵੰਤ ਮਾਨ, ਅਰਵਿੰਦ ਕੇਜਰੀਵਾਲ ਤੇ ਹਰਜੋਤ ਸਿੰਘ ਬੈਂਸ ਕਲਾਸਰੂਮ ਦੇ ਅੰਦਰ ਜਾਂਦੇ ਦਿਖਾਈ ਦਿੰਦੇ ਹਨ। ਇਸੇ ਦੌਰਾਨ ਇੱਕ ਵਿਅਕਤੀ ਉੱਥੇ ਪਹੁੰਚਦਾ ਹੈ ਤੇ ਸੀਐਮ ਭਗਵੰਤ ਮਾਨ ਨੂੰ ਥੱਪੜ ਮਾਰਦਾ ਹੋਇਆ ਦਿਖਾਇਆ ਜਾਂਦਾ ਹੈ।
ਵੀਡੀਓ ‘ਚ ਵਿਅਕਤੀ ਕਹਿੰਦਾ ਹੈ, ‘ਮਾਨ ਸਾਹਿਬ, ਮੇਰੇ ਬੱਚੇ ਨੂੰ ਗਲਤ ਪੜ੍ਹਾਇਆ ਜਾ ਰਿਹਾ ਹੈ। ਕੱਲ੍ਹ ਇਹ ਪੇਪਰ ‘ਚ ਗਲਤ ਲਿਖੇਗਾ। ਤਾਂ ਜ਼ਿੰਮੇਵਾਰ ਮੇਰਾ ਬੱਚਾ ਹੋਵੇਗਾ ਜਾਂ ਤੁਹਾਡੀ ਸਰਕਾਰ?’
ਇਸ ਤੋਂ ਬਾਅਦ ਵੀਡੀਓ ‘ਚ ਸੀਐਮ ਭਗਵੰਤ ਮਾਨ, ਅਰਵਿੰਦ ਕੇਜਰੀਵਾਲ ਤੇ ਹਰਜੋਤ ਸਿੰਘ ਬੈਂਸ ਸਿਰ ਝੁਕਾਏ ਹੋਏ ਦਿਖਾਈ ਦਿੰਦੇ ਹਨ। ਵੀਡੀਓ ਦੇ ਅੰਤ ‘ਚ ਪੰਜਾਬੀ ‘ਚ ਸੰਦੇਸ਼ ਆਉਂਦਾ ਹੈ ਕਿ ‘ਸਵਾਲ ਸਪੈਲਿੰਗ ਦਾ ਨਹੀਂ, ਬੱਚਿਆਂ ਦੇ ਭਵਿੱਖ ਦਾ ਹੈ।’
ਆਮ ਆਦਮੀ ਪਾਰਟੀ ਨੇ ਵਿਰੋਧ ਜਤਾਇਆ
ਵੀਡੀਓ ਸਾਹਮਣੇ ਆਉਣ ਤੋਂ ਬਾਅਦ ਆਮ ਆਦਮੀ ਪਾਰਟੀ ਨੇ ਇਸ ਦਾ ਵਿਰੋਧ ਕੀਤਾ ਹੈ। ਆਮ ਆਦਮੀ ਪਾਰਟੀ ਨੇ ਵੀਡੀਓ ਨੂੰ ਇਤਰਾਜ਼ਯੋਗ ਦੱਸਦੇ ਹੋਏ ਕਿਹਾ ਕਿ ਇਸ ‘ਚ ਪੱਗ ਪਹਿਣੇ ਹੋਏ ਸਿੱਖ ਦਾ ਅਪਮਾਨ ਕੀਤਾ ਜਾ ਰਿਹਾ ਹੈ। ਹਾਲਾਂਕਿ, ਇਸ ਤੋਂ ਪਹਿਲਾਂ ਆਮ ਆਦਮੀ ਪਾਰਟੀ ਪੰਜਾਬ ਤੇ ਸ਼੍ਰੋਮਣੀ ਅਕਾਲੀ ਦਲ ਵੱਲੋਂ ਵੀ ਵਿਰੋਧੀ ਆਗੂਆਂ ਨੂੰ ਨਿਸ਼ਾਨਾ ਬਣਾਉਂਦੇ ਹੋਏ ਇਸ ਤਰ੍ਹਾਂ ਦੀਆਂ AI ਜਨਰੇਟਿਡ ਵੀਡੀਓਜ਼ ਜਾਰੀ ਕੀਤੀਆਂ ਜਾਂਦੀਆਂ ਰਹੀਆਂ ਹਨ।
