ਇਹ ਖ਼ੁਦਾਈ ਪੁਰਾਣੇ ਪੰਚਾਇਤ ਘਰ ਵਾਲੀ ਥਾਂ ‘ਤੇ ਬਣ ਰਹੀ ਨਵੀਂ ਲਾਇਬ੍ਰੇਰੀ ਲਈ ਕੀਤੀ ਜਾ ਰਹੀ ਸੀ।
ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ (ਮੁਹਾਲੀ) ਦੇ ਪਿੰਡ ਘੜੂੰਆਂ ‘ਚ ਮੰਗਲਵਾਰ ਨੂੰ ਉਸ ਸਮੇਂ ਲੋਕਾਂ ਦੀ ਭੀੜ ਇਕੱਠੀ ਹੋ ਗਈ, ਜਦੋਂ ਲਾਇਬ੍ਰੇਰੀ ਦੀ ਉਸਾਰੀ ਲਈ ਜ਼ਮੀਨ ਦੀ ਖ਼ੁਦਾਈ ਦੌਰਾਨ ਪੁਰਾਣੇ ਚਾਂਦੀ ਦੇ ਸਿੱਕਿਆਂ ਨਾਲ ਭਰਿਆ ਇੱਕ ਕੁੱਜਾ ਮਿਲਿਆ। ਸਿੱਕੇ ਮਿਲਣ ਦੀ ਖ਼ਬਰ ਪਿੰਡ ‘ਚ ਫੈਲਦਿਆਂ ਹੀ ਲੋਕ ਮੌਕੇ ‘ਤੇ ਪਹੁੰਚਣ ਲੱਗ ਪਏ। ਦੇਰ ਰਾਤ ਤੱਕ ਇਸ ਨੂੰ ਲੈ ਕੇ ਪਿੰਡ ‘ਚ ਕਾਫ਼ੀ ਚਰਚਾ ਰਹੀ।
ਦੱਸਿਆ ਜਾ ਰਿਹਾ ਹੈ ਕਿ ਇਹ ਖ਼ੁਦਾਈ ਪੁਰਾਣੇ ਪੰਚਾਇਤ ਘਰ ਵਾਲੀ ਥਾਂ ‘ਤੇ ਬਣ ਰਹੀ ਨਵੀਂ ਲਾਇਬ੍ਰੇਰੀ ਲਈ ਕੀਤੀ ਜਾ ਰਹੀ ਸੀ। ਮਜ਼ਦੂਰ ਨੀਂਹ ਲਈ ਮਿੱਟੀ ਕੱਢ ਰਹੇ ਸਨ ਕਿ ਉਨ੍ਹਾਂ ਨੂੰ ਜ਼ਮੀਨ ‘ਚ ਇੱਕ ਪੁਰਾਣਾ ਕੁੱਜਾ ਦਿਖਾਈ ਦਿੱਤਾ। ਕੁੱਜਾ ਬਾਹਰ ਕੱਢ ਕੇ ਦੇਖਿਆ ਗਿਆ ਤਾਂ ਇਸ ਵਿੱਚ ਕਾਫ਼ੀ ਗਿਣਤੀ ‘ਚ ਚਾਂਦੀ ਦੇ ਪੁਰਾਣੇ ਸਿੱਕੇ ਸਨ।
ਮੌਕੇ ‘ਤੇ ਮੌਜੂਦ ਲੋਕਾਂ ਦਾ ਕਹਿਣਾ ਹੈ ਕਿ ਕੁਝ ਸਿੱਕਿਆਂ ‘ਤੇ ਉਰਦੂ ‘ਚ ਲਿਖਿਆ ਹੋਇਆ ਦਿਖਾਈ ਦੇ ਰਿਹਾ ਹੈ। ਫਿਲਹਾਲ, ਇਹ ਸਿੱਕੇ ਕਿੰਨੇ ਪੁਰਾਣੇ ਹਨ ਤੇ ਕਿਸ ਦੌਰ ਨਾਲ ਸਬੰਧਤ ਹਨ, ਇਸ ਬਾਰੇ ਕੋਈ ਅਧਿਕਾਰਤ ਪੁਸ਼ਟੀ ਨਹੀਂ ਹੋਈ।
ਰਾਤ ਨੂੰ ਟਾਰਚਾਂ ਲੈ ਕੇ ਪਹੁੰਚੇ ਲੋਕ
ਵਾਰਡ ਕੌਂਸਲਰ ਸ਼ੇਰ ਸਿੰਘ ਮੁਤਾਬਕ, ਸਿੱਕਿਆਂ ਦੀ ਗੱਲ ਪਤਾ ਲੱਗਣ ਤੋਂ ਬਾਅਦ ਵੱਡੀ ਗਿਣਤੀ ‘ਚ ਲੋਕ ਮੌਕੇ ‘ਤੇ ਇਕੱਠੇ ਹੋ ਗਏ। ਹਨੇਰਾ ਹੋਣ ਤੋਂ ਬਾਅਦ ਵੀ ਕਈ ਲੋਕ ਟਾਰਚਾਂ ਤੇ ਮੋਬਾਈਲ ਫੋਨਾਂ ਦੀ ਰੌਸ਼ਨੀ ਨਾਲ ਖ਼ੁਦਾਈ ਵਾਲੀ ਥਾਂ ‘ਤੇ ਸਿੱਕੇ ਲੱਭਦੇ ਰਹੇ।
ਉਨ੍ਹਾਂ ਦੱਸਿਆ ਕਿ ਹਾਲੇ ਇਹ ਸਪੱਸ਼ਟ ਨਹੀਂ ਹੋ ਸਕਿਆ ਕਿ ਕੁੱਲ ਕਿੰਨੇ ਸਿੱਕੇ ਮਿਲੇ ਹਨ। ਇਸ ਦੌਰਾਨ ਕੁਝ ਲੋਕਾਂ ਵੱਲੋਂ ਮਿਲੇ ਸਿੱਕੇ ਆਪਣੇ ਨਾਲ ਲੈ ਜਾਣ ਦੀ ਗੱਲ ਵੀ ਸਾਹਮਣੇ ਆਈ ਹੈ। ਮਾਮਲੇ ਦੀ ਜਾਣਕਾਰੀ ਮਿਲਣ ‘ਤੇ ਪੁਲਿਸ ਮੌਕੇ ‘ਤੇ ਪਹੁੰਚੀ ਤੇ ਨਿਰਮਾਣ ਵਾਲੀ ਥਾਂ ਨੂੰ ਆਪਣੇ ਕੰਟਰੋਲ ‘ਚ ਲੈ ਲਿਆ।
ਪ੍ਰਸ਼ਾਸਨ ਨੇ ਮਾਮਲੇ ਦਾ ਲਿਆ ਨੋਟਿਸ
ਨਗਰ ਪੰਚਾਇਤ ਘੜੂੰਆਂ ਦੇ ਈਓ ਰਵੀ ਜਿੰਦਲ ਨੇ ਮਾਮਲੇ ਦਾ ਪਤਾ ਲੱਗਣ ਤੋਂ ਬਾਅਦ ਅਧਿਕਾਰੀਆਂ ਨੂੰ ਲੋੜੀਂਦੀ ਕਾਰਵਾਈ ਕਰਨ ਦੇ ਨਿਰਦੇਸ਼ ਦਿੱਤੇ। ਉਨ੍ਹਾਂ ਮੁਤਾਬਕ ਪੁਲਿਸ ਨੂੰ ਮੌਕੇ ਦੀ ਸੁਰੱਖਿਆ ਲਈ ਕਿਹਾ ਗਿਆ ਹੈ। ਬਰਾਮਦ ਹੋਈ ਸਮੱਗਰੀ ਨੂੰ ਸੁਰੱਖਿਅਤ ਰੱਖਣ ਤੇ ਇਸ ਸਬੰਧੀ ਸਰਕਾਰੀ ਰਿਕਾਰਡ ਤਿਆਰ ਕਰਨ ਲਈ ਨਗਰ ਪੰਚਾਇਤ ਦੇ ਅਧਿਕਾਰੀਆਂ ਦੀ ਇੱਕ ਟੀਮ ਵੀ ਮੌਕੇ ‘ਤੇ ਭੇਜੀ ਗਈ ਹੈ।
ਘੜੂੰਆਂ ਨੂੰ ਇਲਾਕੇ ਦੇ ਪੁਰਾਣੇ ਪਿੰਡਾਂ ‘ਚ ਗਿਣਿਆ ਜਾਂਦਾ ਹੈ। ਪਿੰਡ ‘ਚ ਮੌਜੂਦ ਪਾਂਡਵ ਸਰੋਵਰ ਨੂੰ ਵੀ ਸਥਾਨਕ ਲੋਕ ਮਹਾਭਾਰਤ ਕਾਲ ਨਾਲ ਜੋੜਦੇ ਹਨ। ਮਾਨਤਾ ਹੈ ਕਿ ਪਾਂਡਵਾਂ ਨੇ ਆਪਣੇ ਅਗਿਆਤਵਾਸ ਦੌਰਾਨ ਇੱਥੇ ਕੁਝ ਸਮਾਂ ਬਿਤਾਇਆ ਸੀ। ਹੁਣ ਖ਼ੁਦਾਈ ਦੌਰਾਨ ਮਿਲੇ ਪੁਰਾਣੇ ਸਿੱਕਿਆਂ ਨੇ ਪਿੰਡ ਦੇ ਇਤਿਹਾਸ ਨੂੰ ਲੈ ਕੇ ਲੋਕਾਂ ਦੀ ਦਿਲਚਸਪੀ ਹੋਰ ਵਧਾ ਦਿੱਤੀ ਹੈ।
