ਇਸ ਵਿਸ਼ਵ-ਵਿਆਪੀ ਮਹਿਲਾ ਟੂਰਨਾਮੈਂਟ ਤੋਂ ਪਹਿਲਾਂ ਕੀਵੀ ਮਹਿਲਾ ਟੀਮ ਨੂੰ ਲਗਾਤਾਰ 10 ਟੀ-20 ਮੈਚਾਂ ’ਚ ਵਿਰੋਧੀ ਦੇਸ਼ਾਂ ਦੀਆਂ ਮਹਿਲਾ ਟੀਮਾਂ ਤੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ|
ਅਰਬ ਦੇਸ਼ ਯੂਏਈ ਦੇ ਵੱਡੇ ਸ਼ਹਿਰ ਦੁੱਬਈ ’ਚ ਖੇਡੇ ਗਏ ਮਹਿਲਾ ਟੀ-20 ਕ੍ਰਿਕਟ ਵਰਲਡ ਕੱਪ ਦੇ ਖ਼ਿਤਾਬੀ ਮੁਕਾਬਲੇ ’ਚ ਨਿਊਜ਼ੀਲੈਂਡ ਦੀਆਂ ਖਿਡਾਰਨਾਂ ਨੇ ਦੱਖਣੀ ਅਫ਼ਰੀਕੀ ਟੀਮ ਨੂੰ 32 ਦੌੜਾਂ ਨਾਲ ਹਰਾ ਕੇ ਪਹਿਲੀ ਵਾਰ ਚੈਂਪੀਅਨ ਬਣਨ ਦਾ ਜੱਸ ਖੱਟਿਆ| ਜੇਤੂ ਕੀਵੀ ਮਹਿਲਾ ਕ੍ਰਿਕਟ ਟੀਮ ਵਲੋਂ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ 5 ਵਿਕਟਾਂ ਗੁਆਉਣ ਸਦਕਾ 158 ਦੌੜਾਂ ਦਾ ਸਨਮਾਨਜਨਕ ਸਕੋਰ ਬਣਾਇਆ ਗਿਆ| ਇਸ ਦੇ ਜਵਾਬ ’ਚ ਦੱਖਣੀ ਅਫ਼ਰੀਕੀ ਮਹਿਲਾ ਖਿਡਾਰਨਾਂ 9 ਵਿਕਟਾਂ ’ਤੇ 126 ਦੌੜਾਂ ’ਤੇ ਢੇਰ ਹੋ ਗਈਆਂ, ਜਿਸ ਸਦਕਾ ਅਫ਼ਰੀਕਨ ਟੀਮ ਨੂੰ ਲਗਾਤਾਰ ਦੂਜੀ ਵਾਰ ਮਹਿਲਾ ਟੀ-20 ਕ੍ਰਿਕਟ ਸੰਸਾਰ ਕੱਪ ’ਚ ਖ਼ਿਤਾਬੀ ਮੁਕਾਬਲਾ ਹਾਰਨ ਦੀ ਨਮੋਸ਼ੀ ਝੱਲਣੀ ਪਈ| ਸਾਲ-2023 ’ਚ ਖੇਡੇ ਗਏ ਟੀ-20 ਕ੍ਰਿਕਟ ਮਹਿਲਾ ਆਲਮੀ ਕੱਪ ’ਚ ਦੱਖਣੀ ਅਫ਼ਰੀਕਾ ਦੀਆਂ ਮਹਿਲਾਵਾਂ ਆਸਟਰੇਲੀਆ ਤੋਂ ਫਾਈਨਲ ਹਾਰਨ ਸਦਕਾ ਉਪ-ਜੇਤੂ ਹੀ ਬਣ ਸਕੀਆਂ ਸਨ| ਕਰੰਟ ਦੁੱਬਈ ਮਹਿਲਾ ਟੀ-20 ਕ੍ਰਿਕਟ ਸੰਸਾਰ ਕੱਪ ’ਚ ਨਿਊਜ਼ੀਲੈਂਡ ਤੋਂ ਦੱਖਣੀ ਅਫ਼ਰੀਕੀ ਟੀਮ ਨੇ 32 ਦੌੜਾਂ ਨਾਲ ਪਛੜਨ ਸਦਕਾ ਖ਼ਿਤਾਬ ਗੁਆਇਆ ਹੈ ਜਦੋਂਕਿ ਇਕ ਸਾਲ ਪਹਿਲਾਂ ਦੱਖਣੀ ਅਫ਼ਰੀਕਾ ਦੀਆਂ ਘਰੇਲੂ ਪਿੱਚਾਂ ’ਤੇ ਖੇਡੇ ਗਏ ਟੀ-20 ਕ੍ਰਿਕਟ ਕਪ ’ਚ ਆਸਟਰੇਲੀਆ ਦੀ ਮਹਿਲਾ ਮਹਿਮਾਨ ਟੀਮ ਨੇ ਮੇਜ਼ਬਾਨ ਦੱਖਣੀ ਅਫ਼ਰੀਕਨ ਮਹਿਲਾ ਖਿਡਾਰਨਾਂ ਨੂੰ 19 ਦੌੜਾਂ ਨਾਲ ਹਰਾ ਕੇ ਉਪ-ਜੇਤੂ ਬਣਨ ਲਈ ਮਜਬੂਰ ਕੀਤਾ ਸੀ| ਸੰਯੁਕਤ ਅਰਬ ਅਮੀਰਾਤ ਦੇ ਪ੍ਰਸਿੱਧ ਸ਼ਹਿਰ ਦੁੱਬਈ ’ਚ ਖੇਡੇ 3 ਤੋਂ 20 ਅਕਤੂਬਰ ਤੱਕ ਖੇਡੇ ਗਏ 9ਵੇਂ ਮਹਿਲਾ ਟੀ-20 ਕ੍ਰਿਕਟ ਸੰਸਾਰ ਕੱਪ ਦੇ ਫਾਈਨਲ ’ਚ ਨਿਊਜ਼ੀਲੈਂਡ ਦੀ ਟੀਮ ਨੇ ਪਹਿਲਾਂ ਖੇਡਦਿਆਂ 5 ਵਿਕਟਾਂ ’ਤੇ 158 ਦੌੜਾਂ ਬਣਾਈਆਂ, ਜਿਸ ’ਚ ਹਰਫ਼ਨਮੌਲਾ ਖਿਡਾਰਨ ਕੇਰ ਅਮੇਲੀਆ 43 ਦੌੜਾਂ ਸ਼ਾਮਿਲ ਹਨ| ਕੇਰ ਤੋਂ ਇਲਾਵਾ ਕੀਵੀ ਟੀਮ ਦੇ ਸਕੋਰ ’ਚ ਸੂਜ਼ੀ ਬੇਟਸ 32 ਤੇ ਬਰੂਕ ਹਾਲੀਡੇ ਵਲੋਂ 38 ਦੌੜਾਂ ਦਾ ਯੋਗਦਾਨ ਪਾਇਆ ਗਿਆ| ਕੀਵੀ ਟੀਮ ਵਲੋਂ ਦਿੱਤੇ 159 ਦੌੜਾਂ ਬਣਾਉਣ ਦੇ ਟੀਚੇ ਦਾ ਪਿੱਛਾ ਕਰਦਿਆਂ ਅਫ਼ਰੀਕਨ ਬੱਲੇਬਾਜ਼ਾਂ ਕਪਤਾਨ ਲਾਰਾ ਵੋਲਵਾਰਟ ਤੇ ਤਜਮਿਨ ਬ੍ਰਿਟਸ ਵੱਲੋਂ ਚੰਗੀ ਸ਼ੁਰੂਆਤ ਕਰਦਿਆਂ 6.4 ਓਵਰਾਂ ’ਚ ਬਿਨਾਂ ਕਿਸੇ ਵਿਕਟ ਦੇ ਨੁਕਸਾਨ ’ਤੇ 51 ਦੌੜਾਂ ਜੋੜੀਆਂ ਗਈਆਂ| ਦੱਖਣੀ ਅਫ਼ਰੀਕੀ ਟੀਮ ਨੂੰ ਪਹਿਲਾ ਝਟਕਾ ਬ੍ਰਿਟਿਸ਼ ਤਜਮਿਨ ਦੇ 17 ਦੇ ਸਕੋਰ ’ਤੇ ਆਊਟ ਹੋਣ ਤੋਂ ਲਗਿਆ| ਪਹਿਲੀ ਵਿਕਟ ਗਿਰਨ ਤੋਂ ਬਾਅਦ ਕਪਤਾਨ ਲਾਰਾ ਵੀ 10ਵੇਂ ਓਵਰ ’ਚ 33 ਦੌੜਾਂ ਬਣਾ ਕੇ ਆਊਟ ਹੋ ਗਈ| ਲਾਰਾ ਤੇ ਬ੍ਰਿਟਸ ਦੇ ਪੈਵੇਲੀਅਨ ਪਰਤਣ ਤੋਂ ਬਾਅਦ ਅਫ਼ਰੀਕਨ ਟੀਮ ਦੀ ਹੋਰ ਕੋਈ ਬੱਲੇਬਾਜ਼ ਕੀਵੀ ਗੇਂਦਬਾਜ਼ੀ ਦਾ ਡੱਟ ਕੇ ਸਾਹਮਣਾ ਨਹੀਂ ਕਰ ਸਕੀ| ਇਸ ਦਾ ਸਿੱਟਾ ਇਹ ਹੋਇਆ ਕਿ ਉਪ-ਜੇਤੂ ਨਾਮਜ਼ਦ ਹੋਈ ਦੱਖਣੀ ਅਫ਼ਰੀਕੀ ਟੀਮ 20 ਓਵਰਾਂ ’ਚ 9 ਵਿਕਟਾਂ ’ਤੇ 129 ਦੌੜਾਂ ਹੀ ਬਣਾ ਸਕੀ| ਕੀਵੀ ਟੀਮ ਦੀਆਂ ਦੋ ਗੇਂਦਬਾਜ਼ਾਂ ਕੇਰ ਅਮੇਲੀਆ ਤੇ ਮੇਰ ਰੋਜ਼ਮੈਰੀ ਨੇ ਅਫ਼ਰੀਕਨ ਟੀਮ ਦੇ 3-3 ਬੱਲੇਬਾਜ਼ਾਂ ਨੂੰ ਪੈਵੇਲੀਅਨ ਦਾ ਰਾਹ ਵਿਖਾਉਣ ’ਚ ਸਫਲਤਾ ਹਾਸਲ ਕੀਤੀ|
ਮਹਿਲਾ ਟੀ-20 ਵਿਸ਼ਵ ਕ੍ਰਿਕਟ ਕੱਪ ਦਾ ਇਤਿਹਾਸ
ਯੂਏਈ-2024 ਮਹਿਲਾ ਕ੍ਰਿਕਟ ਵਿਸ਼ਵ ਕੱਪ ’ਚ ਜਿੱਤ ਦਾ ਪਰਚਮ ਲਹਿਰਾਉਣ ਵਾਲੀ ਕੀਵੀ ਮਹਿਲਾ ਟੀਮ ਤੋਂ ਪਹਿਲਾਂ ਇਸ ਵੰਨਗੀ ’ਚ 8 ਟੀ-20 ਮੁਕਾਬਲੇ ਖੇਡੇ ਜਾ ਚੁੱਕੇ ਹਨ, ਜਿਸ ’ਚ ਸੱਤ ਫਾਈਨਲ ਖੇਡਣ ਵਾਲੀ ਆਸਟਰੇਲੀਆ ਦੀ ਮਹਿਲਾ ਕ੍ਰਿਕਟਰਾਂ ਨੇ ਸਭ ਤੋਂ ਵੱਧ 6 ਵਾਰ ਟਾਈਟਲ ਜਿੱਤਣ ਦਾ ਕਰਿਸ਼ਮਾ ਕੀਤਾ | ਇੰਗਲੈਂਡ ’ਚ ਖੇਡੇ ਗਏ ਪਲੇਠੇ ਮਹਿਲਾ ਟੀ-20 ਵਰਲਡ ਕਪ-2009 ’ਚ ਮੇਜ਼ਬਾਨ ਦੇਸ਼ ਦੀਆਂ ਇੰਗਲਿਸ਼ ਮਹਿਲਾਵਾਂ ਨੇ ਜਿੱਤ ਦਾ ਝੰਡਾ ਗੱਡਿਆ ਸੀ ਜਦੋਂਕਿ ਸਾਲ-2016 ’ਚ ਖੇਡੇ ਗਏ ਮਹਿਲਾ ਟੀ-20 ਆਲਮੀ ਕ੍ਰਿਕਟ ਕੱਪ ’ਚ ਜਿੱਤ ਦਾ ਦੇਵਤਾ ਵੈਸਟ ਇੰਡੀਜ਼ ਦੀਆਂ ਅਫ਼ਰੀਕਨ ਖਿਡਾਰਨਾਂ ’ਤੇ ਦਿਆਲ ਹੋਇਆ ਸੀ| ਮਹਿਲਾ ਟੀ-20 ਵਿਸ਼ਵ ਕ੍ਰਿਕਟ ਕਪ ਦੇ ਖੇਡੇ ਗਏ 9 ਟੂਰਨਾਮੈਂਟਾਂ ’ਚ ਨਿਊਜ਼ੀਲੈਂਡ ਦੀ ਮਹਿਲਾ ਬੱਲੇਬਾਜ਼ ਸੂਜ਼ੀ ਬੇਟਸ ਨੂੰ ਸਭ ਤੋਂ ਜ਼ਿਆਦਾ 1,261 ਦੌੜਾਂ ਆਪਣੇ ਖਾਤੇ ’ਚ ਜਮ੍ਹਾਂ ਕਰਨ ਦਾ ਕਮਾਲ ਕੀਤਾ ਹੋਇਆ ਹੈ| ਟੀ-20 ਸੰਸਾਰ ਕੱਪ ’ਚ ਗੇਂਦਬਾਜ਼ੀ ’ਚ ਆਸਟਰੇਲੀਅਨ ਗੇਂਦਬਾਜ਼ ਮੇਗਨ ਸ਼ੂਟ ਨੂੰ ਰਿਕਾਰਡ 48 ਵਿਕਟਾਂ ਹਾਸਿਲ ਕੀਤੀਆਂ ਹਨ|
ਵਿਸ਼ਵ ਮੁਕਾਬਲਿਆਂ ਦਾ ਸੰਖੇਪ ਵੇਰਵਾ
ਇੰਗਲੈਂਡ-2009: ਇੰਗਲੈਂਡ ’ਚ ਖੇਡੇ ਗਏ ਪਹਿਲੇ ਮਹਿਲਾ ਟੀ-20 ਵਿਸ਼ਵ ਕੱਪ ’ਚ ਮੇਜ਼ਬਾਨ ਦੇ ਖਿਡਾਰਨਾਂ ਨੇ ਮਹਿਮਾਨ ਨਿਊਜ਼ੀਲੈਂਡ ਦੀਆਂ ਕ੍ਰਿਕਟਰਾਂ ਨੂੰ ਉਪ-ਜੇਤੂ ਬਣਨ ਲਈ ਮਜਬੂਰ ਕਰਦਿਆਂ ਪਲੇਠੇ ਟੀ-20 ਕੱਪ ਦੇ ਟਾਈਟਲ ’ਤੇ ਕਬਜ਼ਾ ਜਮਾਇਆ| 2010 ’ਚ ਦੂਜੇ ਟੀ-20 ਮਹਿਲਾ ਕ੍ਰਿਕਟ ਵਿਸ਼ਵ ਕਪ ਦੇ ਫਾਈਨਲ ’ਚ ਆਸਟਰੇਲੀਆ ਦੀਆਂ ਕ੍ਰਿਕਟ ਖਿਡਾਰਨਾਂ ਨੇ ਨਿਊਜ਼ੀਲੈਂਡ ਨੂੰ 3 ਦੌੜਾਂ ਨਾਲ
