ਹਾਦਸੇ ਤੋਂ ਬਾਅਦ ਅਧਿਕਾਰੀਆਂ ਨੇ ਮੌਕੇ ‘ਤੇ ਪਹੁੰਚ ਕੇ ਬਚਾਅ ਮੁਹਿੰਮ ਚਲਾਈ।
ਬਿਹਾਰ ਦੇ ਵੈਸ਼ਾਲੀ ਜ਼ਿਲ੍ਹੇ ‘ਚ ਗੰਗਾ ਨਦੀ ‘ਚ ਹੋਏ ਕਿਸ਼ਤੀ ਹਾਦਸਾ ਵਾਪਰਿਆ ਹੈ। ਰਾਘੋਪੁਰ ਥਾਣਾ ਖੇਤਰ ਦੇ ਰਾਮਪੁਰ ਸ਼ਿਆਮਚੰਦ ਪਿੰਡ ਨੇੜੇ ਮੰਗਲਵਾਰ ਸ਼ਾਮ ਨੂੰ ਵਾਪਰੇ ਇਸ ਹਾਦਸੇ ‘ਚ 13 ਲੋਕਾਂ ਦੀ ਮੌਤ ਹੋ ਗਈ। ਮ੍ਰਿਤਕਾਂ ‘ਚ ਸਾਰੇ ਬੱਚੇ ਹਨ ਤੇ ਉਨ੍ਹਾਂ ਦੀ ਉਮਰ 15 ਸਾਲ ਤੋਂ ਘੱਟ ਦੱਸੀ ਜਾ ਰਹੀ ਹੈ। ਹਾਦਸੇ ਤੋਂ ਬਾਅਦ ਪਿੰਡ ‘ਚ ਚੀਕ-ਚਿਹਾੜਾ ਮਚ ਗਿਆ। ਜਿਸ ਕਿਸ਼ਤੀ ‘ਚ ਸਵਾਰ ਹੋ ਕੇ ਬੱਚੇ ਸ਼ਰਾਧ ਦਾ ਭੋਜਨ ਖਾਣ ਜਾ ਰਹੇ ਸਨ, ਉਸ ਦੀ ਹਾਲਤ ਪਹਿਲਾਂ ਤੋਂ ਹੀ ਖ਼ਰਾਬ ਹੋਣ ਦੀ ਗੱਲ ਸਾਹਮਣੇ ਆਈ ਹੈ।
ਰਾਮਪੁਰ ਸ਼ਿਆਮਚੰਦ ਪਿੰਡ ਦੇ ਇੱਕ ਟੋਲੇ ਦੇ ਲਗਭਗ 20 ਤੋਂ 22 ਬੱਚੇ ਗੰਗਾ ਪਾਰ ਕਰਕੇ ਸ਼ਰਾਧ ਦਾ ਭੋਜਨ ਖਾਣ ਜਾ ਰਹੇ ਸਨ। ਇਹ ਭੋਜਨ ਪਿੰਡ ਦੇ ਹੀ ਸਿੰਗੇਸ਼ਵਰ ਰਾਏ ਦੇ ਘਰ ਰੱਖਿਆ ਗਿਆ ਸੀ। ਉਨ੍ਹਾਂ ਦੀ ਬੱਚੀ ਦੀ ਮੌਤ ਤੋਂ ਬਾਅਦ ਸ਼ਰਾਧ ਦਾ ਪ੍ਰੋਗਰਾਮ ਰੱਖਿਆ ਗਿਆ ਸੀ। ਬੱਚੇ ਇਸੇ ਪ੍ਰੋਗਰਾਮ ‘ਚ ਸ਼ਾਮਲ ਹੋਣ ਲਈ ਕਿਸ਼ਤੀ ‘ਤੇ ਸਵਾਰ ਹੋ ਕੇ ਨਦੀ ਪਾਰ ਕਰ ਰਹੇ ਸਨ।
ਹੜ੍ਹ ਦੌਰਾਨ ਸਰਕਾਰ ਨੇ ਪਿੰਡ ਨੂੰ ਦਿੱਤੀ ਸੀ ਕਿਸ਼ਤੀ
ਪਿੰਡ ਵਾਸੀਆਂ ਮੁਤਾਬਕ, ਕਿਸ਼ਤੀ ਸਰਕਾਰੀ ਸੀ ਤੇ ਹੜ੍ਹ ਦੌਰਾਨ ਪਿੰਡ ਨੂੰ ਮੁਹੱਈਆ ਕਰਵਾਈ ਗਈ ਸੀ। ਕਾਫ਼ੀ ਸਮੇਂ ਤੋਂ ਖ਼ਰਾਬ ਹੋਣ ਦੇ ਬਾਵਜੂਦ ਪਿੰਡ ਵਾਸੀ ਇਸ ਦੀ ਮੁਰੰਮਤ ਕਰਕੇ ਇਸ ਦੀ ਵਰਤੋਂ ਕਰ ਰਹੇ ਸਨ। ਮੰਗਲਵਾਰ ਨੂੰ ਬੱਚੇ ਇਸੇ ਕਿਸ਼ਤੀ ‘ਤੇ ਸਵਾਰ ਹੋ ਕੇ ਨਿਕਲੇ, ਪਰ ਕੁਝ ਦੂਰੀ ਤੈਅ ਕਰਨ ਤੋਂ ਬਾਅਦ ਕਿਸ਼ਤੀ ਡਗਮਗਾਉਣ ਲੱਗੀ ਤੇ ਦੇਖਦੇ ਹੀ ਦੇਖਦੇ ਗੰਗਾ ਨਦੀ ‘ਚ ਡੁੱਬ ਗਈ।
ਉੱਥੇ ਹੀ, ਹਾਦਸੇ ਨੂੰ ਲੈ ਕੇ ਕੁਝ ਲੋਕਾਂ ਦਾ ਕਹਿਣਾ ਹੈ ਕਿ ਕਿਸ਼ਤੀ ਜਰਜਰ ਹਾਲਤ ‘ਚ ਸੀ ਤੇ ਇਸ ‘ਚ ਤਰੇੜ ਆਉਣ ਕਾਰਨ ਪਾਣੀ ਭਰਨ ਲੱਗਾ, ਜਿਸ ਤੋਂ ਬਾਅਦ ਇਹ ਡੁੱਬ ਗਈ। ਜਦਕਿ ਕੁਝ ਪਿੰਡ ਵਾਸੀਆਂ ਨੂੰ ਖ਼ਦਸ਼ਾ ਹੈ ਕਿ ਕਿਸ਼ਤੀ ‘ਚ ਉਸ ਦੀ ਸਮਰੱਥਾ ਤੋਂ ਵੱਧ ਲੋਕ ਸਵਾਰ ਸਨ। ਇਨ੍ਹਾਂ ਦੋਵਾਂ ਸੰਭਾਵਨਾਵਾਂ ਦੇ ਮੱਦੇਨਜ਼ਰ ਹਾਦਸੇ ਦੇ ਅਸਲ ਕਾਰਨਾਂ ਦੀ ਜਾਂਚ ਕਰਨਾ ਅਹਿਮ ਹੋ ਗਿਆ ਹੈ।
13 ਦੀ ਮੌਤ, ਤਿੰਨ ਬੱਚਿਆਂ ਨੂੰ ਬਚਾਇਆ ਗਿਆ
ਕਿਸ਼ਤੀ ਡੁੱਬਣ ਦੀ ਖ਼ਬਰ ਫੈਲਦਿਆਂ ਹੀ ਪਿੰਡ ‘ਚ ਹਫੜਾ-ਦਫੜੀ ਮਚ ਗਈ। ਲੋਕ ਆਪਣੇ ਬੱਚਿਆਂ ਨੂੰ ਬਚਾਉਣ ਲਈ ਗੰਗਾ ਵੱਲ ਦੌੜੇ। ਇਸ ਹਾਦਸੇ ‘ਚ 13 ਲੋਕਾਂ ਦੀ ਮੌਤ ਹੋਣ ਦੀ ਸੂਚਨਾ ਹੈ। ਮ੍ਰਿਤਕਾਂ ਵਿੱਚ ਮੀਰਾ ਕੁਮਾਰੀ, ਨਿਸ਼ੂ ਕੁਮਾਰੀ, ਅਨੀਸ਼ਾ ਕੁਮਾਰੀ, ਸੁਨੀਤਾ ਕੁਮਾਰੀ, ਆਰੀਅਨ ਕੁਮਾਰ, ਮੋਹਨ ਕੁਮਾਰ, ਅੰਮ੍ਰਿਤਾ ਕੁਮਾਰੀ, ਅੰਕਿਤਾ ਕੁਮਾਰੀ, ਪਿੰਕੀ ਕੁਮਾਰੀ, ਨਮਨ ਕੁਮਾਰ, ਸਿਕੀ ਕੁਮਾਰੀ, ਭੋਨੂ ਕੁਮਾਰੀ ਤੇ ਸੋਨਮ ਕੁਮਾਰੀ ਦੇ ਨਾਂ ਸਾਹਮਣੇ ਆਏ ਹਨ।
ਅਨੁਸ਼ਕਾ ਕੁਮਾਰੀ, ਕਾਰਤਿਕ ਤੇ ਪੁਟੂਸ ਕੁਮਾਰ ਨੂੰ ਜ਼ਿੰਦਾ ਬਚਾਏ ਜਾਣ ਦੀ ਜਾਣਕਾਰੀ ਮਿਲੀ ਹੈ। ਉੱਥੇ ਹੀ, ਜ਼ਖ਼ਮੀਆਂ ‘ਚੋਂ ਲਗਭਗ ਅੱਧੇ ਦਰਜਨ ਲੋਕਾਂ ਨੂੰ ਇਲਾਜ ਲਈ ਪਟਨਾ ਰੈਫ਼ਰ ਕੀਤਾ ਗਿਆ। ਬੱਚਿਆਂ ਨੂੰ ਹਸਪਤਾਲ ਪਹੁੰਚਾਉਣ ਲਈ ਐਂਬੂਲੈਂਸਾਂ ਘੱਟ ਪੈ ਗਈਆਂ। ਅਜਿਹੇ ‘ਚ ਪਿੰਡ ਵਾਸੀ ਜ਼ਖ਼ਮੀਆਂ ਨੂੰ ਮੰਜਿਆਂ ‘ਤੇ ਪਾ ਕੇ ਹਸਪਤਾਲ ਲਿਜਾਂਦੇ ਨਜ਼ਰ ਆਏ।
ਮੌਕੇ ‘ਤੇ ਪਹੁੰਚੇ ਅਧਿਕਾਰੀ, ਪਰਿਵਾਰਾਂ ‘ਚ ਗੁੱਸਾ
ਹਾਦਸੇ ਦੀ ਸੂਚਨਾ ਮਿਲਦਿਆਂ ਹੀ ਵੈਸ਼ਾਲੀ ਦੀ ਜ਼ਿਲ੍ਹਾ ਮੈਜਿਸਟ੍ਰੇਟ ਵਰਸ਼ਾ ਸਿੰਘ ਨੇ ਅਧਿਕਾਰੀਆਂ ਨੂੰ ਅਲਰਟ ਕੀਤਾ। ਸਦਰ ਐੱਸਡੀਓ ਵਿਸ਼ਾਲ ਕੁਮਾਰ, ਐੱਸਡੀਪੀਓ ਸੁਬੋਧ ਕੁਮਾਰ, ਸੀਨੀਅਰ ਪੁਲਿਸ ਅਧਿਕਾਰੀ ਸ਼ੁਭਾਂਕ ਮਿਸ਼ਰਾ ਸਮੇਤ ਹੋਰ ਅਧਿਕਾਰੀ ਮੌਕੇ ‘ਤੇ ਪਹੁੰਚੇ। ਐੱਸਡੀਆਰਐੱਫ ਦੀ ਟੀਮ ਨੇ ਬਚਾਅ ਮੁਹਿੰਮ ਦੀ ਜ਼ਿੰਮੇਵਾਰੀ ਸੰਭਾਲੀ। ਰਾਘੋਪੁਰ ਦੇ ਮੁੱਢਲੇ ਸਿਹਤ ਕੇਂਦਰ ‘ਚ ਲਾਸ਼ਾਂ ਰੱਖੀਆਂ ਗਈਆਂ, ਜਿੱਥੇ ਪਰਿਵਾਰਾਂ ਦੇ ਚੀਕ-ਚਿਹਾੜੇ ਦਰਮਿਆਨ ਭਾਰੀ ਭੀੜ ਇਕੱਠੀ ਹੋ ਗਈ। ਪੁਲਿਸ ਪੋਸਟਮਾਰਟਮ ਦੀ ਪ੍ਰਕਿਰਿਆ ‘ਚ ਲੱਗੀ ਰਹੀ। ਹਾਦਸੇ ਤੋਂ ਗੁੱਸੇ ‘ਚ ਆਏ ਪਿੰਡ ਵਾਸੀਆਂ ਨੇ ਡੀਐੱਮ ਵਰਸ਼ਾ ਸਿੰਘ ਖ਼ਿਲਾਫ਼ ਨਾਅਰੇਬਾਜ਼ੀ ਵੀ ਕੀਤੀ।
ਮ੍ਰਿਤਕਾਂ ਦੇ ਪਰਿਵਾਰਾਂ ਨੂੰ 4-4 ਲੱਖ ਰੁਪਏ ਦੀ ਸਹਾਇਤਾ
ਬਿਹਾਰ ਸਰਕਾਰ ਨੇ ਹਾਦਸੇ ‘ਚ ਜਾਨ ਗੁਆਉਣ ਵਾਲਿਆਂ ਦੇ ਪਰਿਵਾਰਾਂ ਨੂੰ 4-4 ਲੱਖ ਰੁਪਏ ਦੀ ਆਰਥਿਕ ਸਹਾਇਤਾ ਦੇਣ ਦਾ ਐਲਾਨ ਕੀਤਾ ਹੈ। ਪਿੰਡ ‘ਚ ਸੋਗ ਦਾ ਮਾਹੌਲ ਹੈ ਤੇ ਹਰ ਪਰਿਵਾਰ ਦੇ ਮਨ ‘ਚ ਇਹੀ ਸਵਾਲ ਹੈ ਕਿ ਜੇਕਰ ਜਰਜਰ ਕਿਸ਼ਤੀ ਦੀ ਸਮੇਂ ਸਿਰ ਜਾਂਚ ਕੀਤੀ ਜਾਂਦੀ ਜਾਂ ਸੁਰੱਖਿਆ ਦੇ ਢੁੱਕਵੇਂ ਪ੍ਰਬੰਧ ਕੀਤੇ ਜਾਂਦੇ, ਤਾਂ ਕੀ ਇਨ੍ਹਾਂ ਮਾਸੂਮਾਂ ਦੀ ਜਾਨ ਬਚਾਈ ਜਾ ਸਕਦੀ ਸੀ?
