ਗੁਜਰਾਤ ਟਾਈਟਨਸ ਨੇ ਲਗਾਤਾਰ ਦੋ ਮੈਚਾਂ ਵਿੱਚ ਮਿਲੀ ਹਾਰ ਤੋਂ ਬਾਅਦ ਸ਼ਾਨਦਾਰ ਅੰਦਾਜ਼ ਵਿੱਚ ਵਾਪਸੀ ਕੀਤੀ ਹੈ।.
ਗੁਜਰਾਤ ਟਾਈਟਨਸ ਨੇ ਲਗਾਤਾਰ ਦੋ ਮੈਚਾਂ ਵਿੱਚ ਮਿਲੀ ਹਾਰ ਤੋਂ ਬਾਅਦ ਸ਼ਾਨਦਾਰ ਅੰਦਾਜ਼ ਵਿੱਚ ਵਾਪਸੀ ਕੀਤੀ ਹੈ। ਸ਼ੁਭਮਨ ਗਿੱਲ ਦੀ ਕਪਤਾਨੀ ਵਾਲੀ ਗੁਜਰਾਤ ਟਾਈਟਨਸ ਨੇ ਚੇਨਈ ਸੁਪਰ ਕਿੰਗਜ਼ ਨੂੰ ਉਸ ਦੇ ਘਰ ਵਿੱਚ ਹੀ ਇੱਕਤਰਫਾ ਮੁਕਾਬਲੇ ਵਿੱਚ 8 ਵਿਕਟਾਂ ਨਾਲ ਮਾਤ ਦਿੱਤੀ। ਇਸ ਜਿੱਤ ਦੇ ਨਾਲ ਹੀ ਟਾਈਟਨਸ ਨੇ ਇਸ ਸੀਜ਼ਨ ਵਿੱਚ ਆਪਣੀ ਚੌਥੀ ਜਿੱਤ ਦਰਜ ਕਰ ਲਈ ਹੈ। ਇਸ ਜਿੱਤ ਦੇ ਅਸਲੀ ਸਟਾਰ ਟੀਮ ਦੇ ਤੇਜ਼ ਗੇਂਦਬਾਜ਼ ਕਗੀਸੋ ਰਬਾਡਾ ਰਹੇ, ਜਿਨ੍ਹਾਂ ਦੇ ਘਾਤਕ ਸਪੈੱਲ ਨੇ ਚੇਨਈ ਨੂੰ ਸਿਰਫ਼ 158 ਦੌੜਾਂ ‘ਤੇ ਰੋਕ ਦਿੱਤਾ। ਇਸ ਤੋਂ ਬਾਅਦ ਸਾਈ ਸੁਦਰਸ਼ਨ ਦੀ ਦਮਦਾਰ ਅਰਧ ਸੈਂਕੜੇ ਵਾਲੀ ਪਾਰੀ ਦੇ ਦਮ ‘ਤੇ ਗੁਜਰਾਤ ਨੇ ਸਿਰਫ਼ 17 ਓਵਰਾਂ ਦੇ ਅੰਦਰ ਹੀ ਟੀਚਾ ਹਾਸਲ ਕਰ ਲਿਆ।
ਰਬਾਡਾ ਸਮੇਤ ਤੇਜ਼ ਗੇਂਦਬਾਜ਼ਾਂ ਦਾ ਕਹਿਰ
ਚੇਨਈ ਦੇ ਐੱਮ.ਏ. ਚਿਦੰਬਰਮ ਸਟੇਡੀਅਮ ਵਿੱਚ ਖੇਡਿਆ ਗਿਆ ਇਹ ਮੈਚ ਪੂਰੀ ਤਰ੍ਹਾਂ ਗੁਜਰਾਤ ਦੇ ਨਾਮ ਰਿਹਾ। ਜਿੱਥੇ ਇੱਕ ਦਿਨ ਪਹਿਲਾਂ ਹੀ ਦਿੱਲੀ ਅਤੇ ਜੈਪੁਰ ਵਿੱਚ ਖੇਡੇ ਗਏ ਮੁਕਾਬਲਿਆਂ ਵਿੱਚ ਗੇਂਦਬਾਜ਼ਾਂ ਦੀ ਜੰਮ ਕੇ ਕੁਟਾਈ ਹੋਈ ਸੀ ਅਤੇ ਵੱਡੇ ਸਕੋਰ ਬਣੇ ਸਨ, ਉੱਥੇ ਹੀ ਚੇਨਈ ਦੀ ਸਪਿਨਰਾਂ ਲਈ ਮਦਦਗਾਰ ਪਿੱਚ ‘ਤੇ ਗੁਜਰਾਤ ਦੇ ਤੇਜ਼ ਗੇਂਦਬਾਜ਼ਾਂ ਦਾ ਕਹਿਰ ਦੇਖਣ ਨੂੰ ਮਿਲਿਆ। ਇਸ ਦੀ ਸ਼ੁਰੂਆਤ ਕਗੀਸੋ ਰਬਾਡਾ ਨੇ ਕੀਤੀ, ਜਿਨ੍ਹਾਂ ਨੇ ਚੌਥੇ ਓਵਰ ਵਿੱਚ ਹੀ ਸੰਜੂ ਸੈਮਸਨ ਅਤੇ ਉਰਵਿਲ ਪਟੇਲ ਨੂੰ ਆਊਟ ਕਰ ਦਿੱਤਾ ਸੀ।
ਰਬਾਡਾ ਦੇ ਨਾਲ ਮੁਹੰਮਦ ਸਿਰਾਜ, ਜੇਸਨ ਹੋਲਡਰ ਅਤੇ ਮਾਨਵ ਸੁਥਾਰ (ਸਪਿਨਰ) ਨੇ ਵੀ ਚੇਨਈ ਦੇ ਬੱਲੇਬਾਜ਼ਾਂ ‘ਤੇ ਦਬਾਅ ਬਣਾਈ ਰੱਖਿਆ। ਇਸ ਦਾ ਨਤੀਜਾ ਇਹ ਰਿਹਾ ਕਿ ਟੀਮ ਨੇ ਸਿਰਫ਼ 37 ਦੌੜਾਂ ‘ਤੇ 4 ਵਿਕਟਾਂ ਗੁਆ ਦਿੱਤੀਆਂ ਅਤੇ CSK ਦੀ ਪਾਰੀ ਦੀਆਂ 50 ਦੌੜਾਂ 12ਵੇਂ ਓਵਰ ਵਿੱਚ ਜਾ ਕੇ ਪੂਰੀਆਂ ਹੋਈਆਂ। ਹਾਲਾਂਕਿ, ਇਸ ਦੇ ਬਾਵਜੂਦ ਚੇਨਈ ਨੇ ਅਗਲੇ 8 ਓਵਰਾਂ ਵਿੱਚ 107 ਦੌੜਾਂ ਜੋੜਦੇ ਹੋਏ 158 ਦੌੜਾਂ ਬਣਾ ਕੇ ਦਮਦਾਰ ਵਾਪਸੀ ਕੀਤੀ। ਇਸ ਦਾ ਮੁੱਖ ਕਾਰਨ ਕਪਤਾਨ ਰਿਤੂਰਾਜ ਗਾਇਕਵਾੜ ਸਨ, ਜਿਨ੍ਹਾਂ ਨੇ 60 ਗੇਂਦਾਂ ਵਿੱਚ 74 ਦੌੜਾਂ ਦੀ ਪਾਰੀ ਖੇਡੀ, ਜੋ ਉਨ੍ਹਾਂ ਦਾ ਇਸ ਸੀਜ਼ਨ ਵਿੱਚ ਪਹਿਲਾ ਅਰਧ ਸੈਂਕੜਾ ਸੀ। ਉਨ੍ਹਾਂ ਤੋਂ ਇਲਾਵਾ ਜੇਮੀ ਓਵਰਟਨ ਨੇ 6 ਗੇਂਦਾਂ ਵਿੱਚ 18 ਦੌੜਾਂ ਬਣਾ ਕੇ ਟੀਮ ਨੂੰ ਰਫ਼ਤਾਰ ਦਿੱਤੀ।
ਸੁਦਰਸ਼ਨ ਨੇ ਫਿਰ ਦਿਖਾਇਆ ਬੱਲੇ ਦਾ ਦਮ
ਗੇਂਦਬਾਜ਼ਾਂ ਤੋਂ ਬਾਅਦ ਵਾਰੀ ਗੁਜਰਾਤ ਦੇ ਬੱਲੇਬਾਜ਼ਾਂ ਦੀ ਸੀ ਅਤੇ ਇੱਕ ਵਾਰ ਫਿਰ ਕਪਤਾਨ ਸ਼ੁਭਮਨ ਗਿੱਲ ਅਤੇ ਸਾਈ ਸੁਦਰਸ਼ਨ ਦੀ ਓਪਨਿੰਗ ਜੋੜੀ ਨੇ ਕੰਮ ਆਸਾਨ ਕਰ ਦਿੱਤਾ। ਦੋਵਾਂ ਨੇ ਸਿਰਫ਼ 6.2 ਓਵਰਾਂ ਵਿੱਚ 58 ਦੌੜਾਂ ਦੀ ਤੇਜ਼ ਸਾਂਝੇਦਾਰੀ ਕਰਕੇ ਗੁਜਰਾਤ ਨੂੰ ਜ਼ੋਰਦਾਰ ਸ਼ੁਰੂਆਤ ਦਿਵਾਈ। ਇਸ ਤੋਂ ਬਾਅਦ ਸਾਈ ਸੁਦਰਸ਼ਨ ਦਾ ਜਲਵਾ ਦੇਖਣ ਨੂੰ ਮਿਲਿਆ, ਜਿਨ੍ਹਾਂ ਨੇ ਲਗਾਤਾਰ ਦੂਜੇ ਮੈਚ ਵਿੱਚ 50 ਦਾ ਅੰਕੜਾ ਪਾਰ ਕੀਤਾ। ਉਨ੍ਹਾਂ ਨੇ ਜੋਸ ਬਟਲਰ ਨਾਲ ਮਿਲ ਕੇ ਟੀਮ ਨੂੰ ਜਿੱਤ ਦੇ ਕਰੀਬ ਪਹੁੰਚਾ ਦਿੱਤਾ। ਹਾਲਾਂਕਿ ਉਹ ਆਪਣੇ ਲਗਾਤਾਰ ਦੂਜੇ ਸੈਂਕੜੇ ਤੋਂ ਖੁੰਝ ਗਏ ਅਤੇ 87 ਦੌੜਾਂ ਬਣਾ ਕੇ ਆਊਟ ਹੋ ਗਏ। ਪਰ ਜੋਸ ਬਟਲਰ (39 ਨਾਬਾਦ) ਨੇ 16.4 ਓਵਰਾਂ ਵਿੱਚ ਟੀਮ ਨੂੰ ਜਿੱਤ ਦਿਵਾ ਕੇ ਮੈਚ ਖ਼ਤਮ ਕੀਤਾ।
