ਕੇਂਦਰ ਸਰਕਾਰ ਦੇ ਕਰਮਚਾਰੀਆਂ ਲਈ ਮਹਿੰਗਾਈ ਭੱਤੇ (DA) ਵਿੱਚ 2 ਪ੍ਰਤੀਸ਼ਤ ਵਾਧੇ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ।
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਵਾਲੀ ਕੈਬਨਿਟ ਨੇ ਕੇਂਦਰੀ ਸਰਕਾਰੀ ਕਰਮਚਾਰੀਆਂ ਲਈ ਮਹਿੰਗਾਈ ਭੱਤੇ (ਡੀਏ) ਵਿੱਚ 2 ਪ੍ਰਤੀਸ਼ਤ ਵਾਧੇ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਕੇਂਦਰੀ ਸਰਕਾਰੀ ਕਰਮਚਾਰੀਆਂ ਨੂੰ ਅਪ੍ਰੈਲ ਮਹੀਨੇ ਦੀ ਤਨਖਾਹ ਦੇ ਨਾਲ ਜਨਵਰੀ, ਫਰਵਰੀ ਅਤੇ ਮਾਰਚ ਦਾ ਬਕਾਇਆ ਵੀ ਮਿਲ ਸਕਦਾ ਹੈ।
DA ਵਿੱਚ ਵਾਧੇ ਦਾ ਕਿਸਨੂੰ ਹੋਵੇਗਾ ਫਾਇਦਾ ?
ਕੇਂਦਰ ਸਰਕਾਰ ਦੇ ਕਰਮਚਾਰੀਆਂ ਨੂੰ ਮੌਜੂਦਾ ਮਹਿੰਗਾਈ ਦਰ ਅਤੇ ਉਨ੍ਹਾਂ ਦੀ ਮੂਲ ਤਨਖਾਹ ਦੇ ਆਧਾਰ ‘ਤੇ ਮਹਿੰਗਾਈ ਭੱਤਾ ਦਿੱਤਾ ਜਾਂਦਾ ਹੈ, ਜਦੋਂ ਕਿ ਪੈਨਸ਼ਨਰਾਂ ਨੂੰ ਮਹਿੰਗਾਈ ਰਾਹਤ ਮਿਲਦੀ ਹੈ। ਇਨ੍ਹਾਂ ਦਾ ਮਕਸਦ ਕਰਮਚਾਰੀਆਂ ਅਤੇ ਪੈਨਸ਼ਨਰਾਂ ‘ਤੇ ਮਹਿੰਗਾਈ ਦੇ ਬੋਝ ਨੂੰ ਘਟਾਉਣਾ ਹੈ। ਸਰਕਾਰ ਮਹਿੰਗਾਈ ਦਰ ਦੇ ਆਧਾਰ ‘ਤੇ ਸਾਲ ਵਿੱਚ ਦੋ ਵਾਰ ਇਸਨੂੰ ਬਦਲਦੀ ਹੈ।
ਮਹਿੰਗਾਈ ਭੱਤੇ ਦੀਆਂ ਨਵੀਆਂ ਦਰਾਂ ਜਨਵਰੀ ਤੋਂ ਜੂਨ ਦੇ ਅੱਧੇ ਸਾਲ ਲਈ ਅਤੇ ਫਿਰ ਜੁਲਾਈ ਤੋਂ ਦਸੰਬਰ ਦੇ ਅੱਧੇ ਸਾਲ ਲਈ ਲਾਗੂ ਹੁੰਦੀਆਂ ਹਨ। ਸਰਕਾਰ ਦੁਆਰਾ ਐਲਾਨਿਆ ਗਿਆ ਮਹਿੰਗਾਈ ਭੱਤਾ ਸਿਰਫ ਸਰਕਾਰੀ ਕਰਮਚਾਰੀਆਂ ਅਤੇ ਜਨਤਕ ਖੇਤਰ ਦੇ ਕੰਮਾਂ ਯਾਨੀ ਸਰਕਾਰੀ ਕੰਪਨੀਆਂ ਵਿੱਚ ਕੰਮ ਕਰਨ ਵਾਲਿਆਂ ਨੂੰ ਮਿਲਦਾ ਹੈ। ਨਿੱਜੀ ਖੇਤਰ ਵਿੱਚ ਕੰਮ ਕਰਨ ਵਾਲੇ ਲੋਕਾਂ ਨੂੰ ਇਸ ਤੋਂ ਕੋਈ ਲਾਭ ਨਹੀਂ ਮਿਲਦਾ।
ਡੀਏ ਵਿੱਚ 2% ਵਾਧਾ
ਇਸ ਵਾਰ ਸਰਕਾਰ ਨੇ ਡੀਏ ਵਿੱਚ 2% ਵਾਧਾ ਕੀਤਾ ਹੈ। ਜਿਸ ਵਿੱਚ ਡੀਏ ਦੀ ਦਰ 53% ਤੋਂ ਵਧ ਕੇ 55% ਹੋ ਗਈ ਹੈ। ਇਹ ਵਾਧਾ ਜੁਲਾਈ-ਦਸੰਬਰ 2024 ਦੇ ਆਲ ਇੰਡੀਆ ਕੰਜ਼ਿਊਮਰ ਪ੍ਰਾਈਸ ਇੰਡੈਕਸ (CPI) ਦੇ ਅੰਕੜਿਆਂ ਦੇ ਆਧਾਰ ‘ਤੇ ਕੀਤਾ ਗਿਆ ਹੈ।
DA ਵਧਣ ਤੇ ਕਿੰਨਾ ਹੋ ਸਕਦਾ ਹੈ ਫਾਇਦਾ?
ਜੇਕਰ ਕਿਸੇ ਕਰਮਚਾਰੀ ਦੀ ਮੂਲ ਤਨਖਾਹ 18 ਹਜ਼ਾਰ ਰੁਪਏ ਹੈ, ਤਾਂ 2 ਪ੍ਰਤੀਸ਼ਤ ਵਾਧੇ ਤੋਂ ਬਾਅਦ, ਉਸਨੂੰ ਹਰ ਮਹੀਨੇ 360 ਰੁਪਏ ਹੋਰ ਮਿਲਣਗੇ। ਇਸ ਤਰ੍ਹਾਂ, ਇੱਕ ਸਾਲ ਵਿੱਚ 4,320 ਰੁਪਏ ਦੀ ਵਾਧੂ ਆਮਦਨ ਹੋਵੇਗੀ। ਦੂਜੇ ਪਾਸੇ, ਜੇਕਰ ਕਿਸੇ ਪੈਨਸ਼ਨਰ ਦੀ ਮੂਲ ਪੈਨਸ਼ਨ 9,000 ਰੁਪਏ ਹੈ, ਤਾਂ 2 ਪ੍ਰਤੀਸ਼ਤ ਵਾਧੇ ਨਾਲ, ਉਸਨੂੰ ਹਰ ਮਹੀਨੇ 180 ਰੁਪਏ ਹੋਰ ਮਿਲਣਗੇ। ਇਸਦਾ ਮਤਲਬ ਹੈ ਕਿ ਉਸਨੂੰ ਇੱਕ ਸਾਲ ਵਿੱਚ ਉਸਦੀ ਪੈਨਸ਼ਨ ਵਿੱਚ 2,160 ਰੁਪਏ ਦਾ ਲਾਭ ਮਿਲੇਗਾ।
ਡੀਏ ਕੀ ਹੈ?
ਮਹਿੰਗਾਈ ਭੱਤਾ ਸਰਕਾਰੀ ਕਰਮਚਾਰੀਆਂ ਨੂੰ ਵਧਦੀ ਮਹਿੰਗਾਈ ਦੇ ਅਨੁਸਾਰ ਉਨ੍ਹਾਂ ਦੀ ਮੂਲ ਤਨਖਾਹ ਨੂੰ ਐਡਜਸਟ ਕਰਨ ਲਈ ਦਿੱਤੀ ਜਾਣ ਵਾਲੀ ਰਕਮ ਹੈ। ਕਮਿਸ਼ਨ ਵਿੱਚ ਹਰ 10 ਸਾਲਾਂ ਬਾਅਦ ਤਨਖਾਹ ਮੂਲ ਤਨਖਾਹ ਦਾ ਫੈਸਲਾ ਕੀਤਾ ਜਾਂਦਾ ਹੈ, ਪਰ ਡੀਏ ਕਰਮਚਾਰੀਆਂ ਦੀ ਤਨਖਾਹ ਵਿੱਚ ਸਮੇਂ-ਸਮੇਂ ‘ਤੇ ਵਾਧਾ ਯਕੀਨੀ ਬਣਾਉਂਦਾ ਹੈ।
