ਕਸਬਾ ਘੁਮਾਣ ਦਾ ਨੌਜਵਾਨ Mumbai Airport ‘ਤੇ ਗ੍ਰਿਫਤਾਰ : ਪਾਸਪੋਰਟ ‘ਤੇ ਲਗਾਇਆ ਸੀ ਅਨਪੜ੍ਹ ਦਾ ਪਰੂਫ

ਲਾਭਦੀਪ ਸਿਰਫ ਪੰਜਵੀਂ ਪਾਸ ਹੈ, ਜਦਕਿ ਉਸਨੇ ਆਪਣੇ ਪਾਸਪੋਰਟ ‘ਤੇ ਅਨਪੜ੍ਹ ਲਿਖਵਾਇਆ ਹੋਇਆ ਸੀ।

 ਸ਼੍ਰੀਹਰਗੋਬਿੰਦਪੁਰ ਸਾਹਿਬ ਦੇ ਘੁਮਾਣ ਕਸਬੇ ਦੇ ਵਸਨੀਕ ਲਾਭਦੀਪ ਸਿੰਘ ਪੁੱਤਰ ਸਵ. ਗੁਰਮੁਖ ਸਿੰਘ ਨੂੰ ਆਬੂਧਾਬੀ ਜਾਂਦੇ ਸਮੇਂ ਮੁੰਬਈ ਏਅਰਪੋਰਟ ‘ਤੇ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਲਾਭਦੀਪ 12 ਫਰਵਰੀ ਨੂੰ ਘਰੋਂ ਗਿਆ ਸੀ ਅਤੇ 16 ਫਰਵਰੀ ਨੂੰ ਮੁੰਬਈ ਏਅਰਪੋਰਟ ‘ਤੇ ਇਮੀਗ੍ਰੇਸ਼ਨ ਅਧਿਕਾਰੀਆਂ ਨੇ ਉਸਨੂੰ ਗ੍ਰਿਫਤਾਰ ਕਰ ਲਿਆ। ਲਾਭਦੀਪ ਸਿਰਫ ਪੰਜਵੀਂ ਪਾਸ ਹੈ, ਜਦਕਿ ਉਸਨੇ ਆਪਣੇ ਪਾਸਪੋਰਟ ‘ਤੇ ਅਨਪੜ੍ਹ ਲਿਖਵਾਇਆ ਹੋਇਆ ਸੀ। ਜਦੋਂ ਇਮੀਗ੍ਰੇਸ਼ਨ ਅਧਿਕਾਰੀਆਂ ਨੇ ਉਸਨੂੰ ਸਾਈਨ ਕਰਨ ਲਈ ਕਿਹਾ, ਤਾਂ ਉਸਨੇ ਪੰਜਾਬੀ ਵਿੱਚ ਦਸਤਖਤ ਕਰ ਦਿੱਤੇ, ਜਿਸ ਕਾਰਨ ਉਸਨੂੰ ਧੋਖਾਧੜੀ ਦੇ ਦੋਸ਼ ‘ਚ ਫੜ ਕੇ ਮੁੰਬਈ ਪੁਲਿਸ ਦੇ ਹਵਾਲੇ ਕਰ ਦਿੱਤਾ ਗਿਆ।

ਲਾਭਦੀਪ ਦੀ ਮਾਤਾ ਸੁਖਵਿੰਦਰ ਕੌਰ ਨੇ ਦੱਸਿਆ ਕਿ ਉਸਦੇ ਪਤੀ ਗੁਰਮੁਖ ਸਿੰਘ ਦੀ ਕੁਝ ਸਾਲ ਪਹਿਲਾਂ ਮੌਤ ਹੋ ਗਈ ਸੀ। ਉਸਦੀ ਦੋ ਧੀਆਂ ਅਤੇ ਇੱਕ ਪੁੱਤਰ ਹੈ। ਛੋਟੀ ਧੀ ਦੇ ਪਤੀ ਦੀ ਵੀ ਮੌਤ ਹੋ ਚੁੱਕੀ ਹੈ। ਉਹ ਲੋਕਾਂ ਦੇ ਘਰਾਂ ਵਿੱਚ ਕੰਮ ਕਰਕੇ ਪਰਿਵਾਰ ਨੂੰ ਪਾਲ ਰਹੀ ਹੈ। ਉਸਨੇ ਪਰਿਵਾਰ ਦੇ ਚੰਗੇ ਭਵਿੱਖ ਲਈ ਲੋਕਾਂ ਤੋਂ ਵਿਆਜ ‘ਤੇ 70 ਹਜ਼ਾਰ ਰੁਪਏ ਲੈ ਕੇ ਪੁੱਤਰ ਨੂੰ ਵਿਦੇਸ਼ ਭੇਜਣ ਦੀ ਕੋਸ਼ਿਸ਼ ਕੀਤੀ ਸੀ, ਪਰ ਕਿਸਮਤ ਨੂੰ ਕੁਝ ਹੋਰ ਹੀ ਮਨਜ਼ੂਰ ਸੀ। ਉਸਦਾ ਪੁੱਤਰ 12 ਫਰਵਰੀ ਨੂੰ ਘਰੋਂ ਗਿਆ ਸੀ ਅਤੇ 16 ਫਰਵਰੀ ਨੂੰ ਮੁੰਬਈ ਏਅਰਪੋਰਟ ‘ਤੇ ਗ੍ਰਿਫਤਾਰ ਹੋ ਗਿਆ। ਉਸਨੇ ਕੇਂਦਰ, ਪੰਜਾਬ ਸਰਕਾਰ ਅਤੇ ਸਮਾਜਸੇਵੀ ਸੰਗਠਨਾਂ ਤੋਂ ਪੁੱਤਰ ਦੀ ਰਿਹਾਈ ਲਈ ਮਦਦ ਦੀ ਅਪੀਲ ਕੀਤੀ ਹੈ।