ਮੱਕਾ ‘ਚ ਪਾਰਾ 52 ਡਿਗਰੀ ਤੱਕ ਪਹੁੰਚਿਆ, ਕਹਿਰ ਦੀ ਗਰਮੀ ਨੇ 500 ਤੋਂ ਵੱਧ ਹਜ ਯਾਤਰੀਆਂ ਦੀ ਲਈ ਜਾਨ

 ਭਿਆਨਕ ਗਰਮੀ ਮੱਕਾ ਜਾਣ ਵਾਲੇ ਹੱਜ ਯਾਤਰੀਆਂ ਦੀ ਮੌਤ ਦਾ ਕਾਰਨ ਬਣ ਰਹੀ ਹੈ। 

ਹੱਜ ਯਾਤਰਾ ਲਈ ਸਾਊਦੀ ਅਰਬ ਦੇ ਮੱਕਾ ਮਦੀਨਾ ‘ਚ ਲੱਖਾਂ ਹੱਜ ਯਾਤਰੀ ਇਕੱਠੇ ਹੋਏ ਹਨ। ਇਸ ਦੌਰਾਨ ਯਾਤਰੀਆਂ ਨੂੰ ਵੀ ਭਿਆਨਕ ਗਰਮੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

ਹਾਲਾਤ ਇਹ ਬਣ ਗਏ ਹਨ ਕਿ ਮੱਕਾ ਵਿੱਚ ਗਰਮੀ ਕਾਰਨ ਕੁੱਲ 550 ਹੱਜ ਯਾਤਰੀਆਂ ਦੀ ਮੌਤ ਹੋ ਚੁੱਕੀ ਹੈ। ਇਨ੍ਹਾਂ ਵਿੱਚੋਂ ਸਭ ਤੋਂ ਵੱਧ 323 ਮਿਸਰ ਦੇ ਹਨ ਜਦਕਿ ਬਾਕੀ ਵੱਖ-ਵੱਖ ਦੇਸ਼ਾਂ ਦੇ ਹਨ। ਇਨ੍ਹਾਂ ਸਾਰੇ ਯਾਤਰੀਆਂ ਦੀ ਮੌਤ ਲਈ ਅੱਤ ਦੀ ਗਰਮੀ ਅਤੇ ਵਧਦੇ ਤਾਪਮਾਨ ਨੂੰ ਜ਼ਿੰਮੇਵਾਰ ਠਹਿਰਾਇਆ ਗਿਆ ਹੈ।

ਇਨ੍ਹਾਂ ਸਾਰਿਆਂ ਦੀ ਮੌਤ ਦੀ ਪੁਸ਼ਟੀ ਕਰਦੇ ਹੋਏ ਇਕ ਡਿਪਲੋਮੈਟ ਨੇ ਦੱਸਿਆ ਕਿ ਮਿਸਰ ਦੇ 323 ਹੱਜ ਯਾਤਰੀਆਂ ‘ਚੋਂ ਇਕ ਨੂੰ ਛੱਡ ਕੇ ਸਾਰੇ ਦੀ ਗਰਮੀ ਕਾਰਨ ਮੌਤ ਹੋ ਗਈ। ਭੀੜ ਦੌਰਾਨ ਇੱਕ ਹਜ ਯਾਤਰੀ ਜ਼ਖਮੀ ਹੋ ਗਿਆ। ਇਹ ਅੰਕੜੇ ਮੱਕਾ ਦੇ ਨੇੜੇ ਅਲ-ਮੁਇਸਮ ਵਿੱਚ ਹਸਪਤਾਲ ਦੇ ਮੁਰਦਾਘਰ ਤੋਂ ਆਉਂਦੇ ਹਨ।

ਜਾਰਡਨ ਦੇ 60 ਲੋਕ ਵੀ ਅੱਤ ਦੀ ਗਰਮੀ ਦਾ ਸ਼ਿਕਾਰ ਹੋ ਗਏ

ਡਿਪਲੋਮੈਟਾਂ ਦੇ ਅਨੁਸਾਰ, ਘੱਟੋ ਘੱਟ 60 ਜਾਰਡਨ ਵਾਸੀਆਂ ਦੀ ਵੀ ਮੌਤ ਹੋ ਗਈ, ਜਦੋਂ ਕਿ ਮੰਗਲਵਾਰ ਨੂੰ ਅਮਾਨ ਦੁਆਰਾ ਅਧਿਕਾਰਤ ਤੌਰ ‘ਤੇ 41 ਮੌਤਾਂ ਦੀ ਰਿਪੋਰਟ ਕੀਤੀ ਗਈ। ਨਿਊਜ਼ ਏਜੰਸੀ ਏਐਫਪੀ ਦੀ ਰਿਪੋਰਟ ਦੇ ਅਨੁਸਾਰ, ਤਾਜ਼ਾ ਅੰਕੜਿਆਂ ਦੇ ਨਾਲ, ਕਈ ਦੇਸ਼ਾਂ ਵਿੱਚ ਹੁਣ ਤੱਕ ਹੋਈਆਂ ਮੌਤਾਂ ਦੀ ਕੁੱਲ ਗਿਣਤੀ 577 ਤੱਕ ਪਹੁੰਚ ਗਈ ਹੈ। ਡਿਪਲੋਮੈਟਾਂ ਨੇ ਦੱਸਿਆ ਕਿ ਮੱਕਾ ਦੇ ਸਭ ਤੋਂ ਵੱਡੇ ਮੁਰਦਾਘਰਾਂ ਵਿੱਚੋਂ ਇੱਕ ਅਲ-ਮੁਆਸਮ ਵਿੱਚ ਕੁੱਲ 550 ਲਾਸ਼ਾਂ ਸਨ।