ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 2 ਫਰਵਰੀ, 2024 ਨੂੰ ਸ਼ਾਮ 4:30 ਵਜੇ ਭਾਰਤ ਮੰਡਪਮ, ਨਵੀਂ ਦਿੱਲੀ ਵਿਖੇ ਇੰਡੀਆ ਮੋਬਿਲਿਟੀ ਗਲੋਬਲ ਐਕਸਪੋ 2024 – ਭਾਰਤ ਦੀ ਸਭ ਤੋਂ ਵੱਡੀ ਅਤੇ ਆਪਣੀ ਕਿਸਮ ਦੀ ਪਹਿਲੀ ਟਰਾਂਸਪੋਰਟ-ਕਨੈਕਟੀਵਿਟੀ ਪ੍ਰਦਰਸ਼ਨੀ ਦੇ ਇੱਕ ਸਮਾਗਮ ਨੂੰ ਸੰਬੋਧਨ ਕਰਨਗੇ।
ਇੰਡੀਆ ਮੋਬਿਲਿਟੀ ਗਲੋਬਲ ਐਕਸਪੋ 2024 ਪੂਰੇ ਟ੍ਰਾਂਸਪੋਰਟੇਸ਼ਨ-ਕਨੈਕਟੀਵਿਟੀ ਅਤੇ ਆਟੋਮੋਟਿਵ ਇੰਡਸਟਰੀ ਵੈਲਿਊ ਚੇਨ ਵਿੱਚ ਭਾਰਤ ਦੀਆਂ ਸਮਰੱਥਾਵਾਂ ਨੂੰ ਪ੍ਰਦਰਸ਼ਿਤ ਕਰੇਗਾ। ਐਕਸਪੋ ਵਿੱਚ ਪ੍ਰਦਰਸ਼ਨੀਆਂ, ਕਾਨਫਰੰਸਾਂ, ਖਰੀਦਦਾਰ-ਵਿਕਰੇਤਾ ਮੀਟਿੰਗਾਂ, ਰਾਜ ਸੈਸ਼ਨ, ਸੜਕ ਸੁਰੱਖਿਆ ਪਵੇਲੀਅਨ ਅਤੇ ਗੋ-ਕਾਰਟਿੰਗ ਵਰਗੇ ਲੋਕ-ਕੇਂਦ੍ਰਿਤ ਆਕਰਸ਼ਣ ਵੀ ਸ਼ਾਮਲ ਹੋਣਗੇ। 50 ਤੋਂ ਵੱਧ ਦੇਸ਼ਾਂ ਦੇ 800 ਤੋਂ ਵੱਧ ਪ੍ਰਦਰਸ਼ਕਾਂ ਦੇ ਨਾਲ, ਐਕਸਪੋ ਅਤਿ-ਆਧੁਨਿਕ ਤਕਨਾਲੋਜੀਆਂ, ਟਿਕਾਊ ਹੱਲਾਂ ਅਤੇ ਨਵੀਨਤਾਕਾਰੀ ਆਵਾਜਾਈ ਤਕਨਾਲੋਜੀਆਂ ਨੂੰ ਉਜਾਗਰ ਕਰੇਗਾ। ਐਕਸਪੋ ਵਿੱਚ 600 ਤੋਂ ਵੱਧ ਆਟੋ ਕੰਪੋਨੈਂਟ ਨਿਰਮਾਤਾਵਾਂ ਤੋਂ ਇਲਾਵਾ 28 ਤੋਂ ਵੱਧ ਵਾਹਨ ਨਿਰਮਾਤਾਵਾਂ ਦੀ ਭਾਗੀਦਾਰੀ ਦੇਖਣ ਨੂੰ ਮਿਲੇਗੀ। ਇਸ ਇਵੈਂਟ ਵਿੱਚ 13 ਤੋਂ ਵੱਧ ਗਲੋਬਲ ਬਾਜ਼ਾਰਾਂ ਦੇ 1000 ਤੋਂ ਵੱਧ ਬ੍ਰਾਂਡ ਆਪਣੇ ਉਤਪਾਦਾਂ, ਤਕਨਾਲੋਜੀਆਂ ਅਤੇ ਸੇਵਾਵਾਂ ਦੀ ਪੂਰੀ ਸ਼੍ਰੇਣੀ ਦਾ ਪ੍ਰਦਰਸ਼ਨ ਕਰਨਗੇ।
