ਇਹ ਮੁਹਿੰਮ ਦੇ ਅੰਤਮ ਪੜਾਅ ‘ਚ ਇੱਕ ਵੱਡੀ ਜਨਤਕ ਰੈਲੀ ਹੋਵੇਗੀ।
ਕਾਂਗਰਸ ਨੇ ਆਉਣ ਵਾਲੀਆਂ ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਆਪਣੀਆਂ ਤਿਆਰੀਆਂ ਤੇਜ਼ ਕਰ ਦਿੱਤੀਆਂ ਹਨ। ਸੂਤਰਾਂ ਮੁਤਾਬਕ, ਕਾਂਗਰਸ ਹਾਈ ਕਮਾਂਡ ਨੇ ਰਾਜ ਦੇ ਸਾਰੇ 117 ਵਿਧਾਨ ਸਭਾ ਹਲਕਿਆਂ ‘ਚ ਆਪਣੀ ਸਥਿਤੀ ਮਜ਼ਬੂਤ ਕਰਨ ਲਈ ਇੱਕ ਵੱਡੀ ਰਣਨੀਤੀ ਤਿਆਰ ਕੀਤੀ ਹੈ। ਮਿਸ਼ਨ ਪੰਜਾਬ 2027 ਵਜੋਂ ਕਾਂਗਰਸ ਨੇ ਸੂਬੇ ਭਰ ‘ਚ ਬੱਸ ਯਾਤਰਾ ਸ਼ੁਰੂ ਕਰਨ ਦਾ ਫੈਸਲਾ ਕੀਤਾ ਹੈ। ਇਹ ਯਾਤਰਾ ਕਈ ਪੜਾਵਾਂ ‘ਚ ਸਾਰੇ ਹਲਕਿਆਂ ਨੂੰ ਕਵਰ ਕਰੇਗੀ। ਸੀਨੀਅਰ ਕਾਂਗਰਸ ਨੇਤਾ ਰਾਹੁਲ ਗਾਂਧੀ ਦੇ ਮੁਹਿੰਮ ਨੂੰ ਹਰੀ ਝੰਡੀ ਦਿਖਾਉਣ ਲਈ ਪੰਜਾਬ ਆਉਣ ਦੀ ਉਮੀਦ ਹੈ। ਇਸ ਪਹਿਲ ‘ਚ ਸੀਨੀਅਰ ਪੰਜਾਬ ਕਾਂਗਰਸ ਆਗੂਆਂ ਦੀ ਭਾਗੀਦਾਰੀ ਵੀ ਦੇਖਣ ਨੂੰ ਮਿਲੇਗੀ, ਜੋ ਪਾਰਟੀ ਏਕਤਾ ਨੂੰ ਪ੍ਰਦਰਸ਼ਿਤ ਕਰੇਗੀ। ਸਾਰੇ ਆਗੂ ਵਿਸ਼ੇਸ਼ ਤੌਰ ‘ਤੇ ਤਿਆਰ ਕੀਤੀ ਗਈ ਮੁਹਿੰਮ ਬੱਸ ‘ਤੇ ਇਕੱਠੇ ਯਾਤਰਾ ਕਰਨਗੇ।
ਪਾਰਟੀ ਇੱਕਜੁਟਤਾ, ਵਰਕਰਾਂ ਦਾ ਮਨੋਬਲ ਤੇ ਗ੍ਰਾਊਂਡ ਤੇ ਮੌਜੂਦਗੀ ਰਹੇਗਾ ਟਾਰਗੇਟ…
ਬੱਸ ਯਾਤਰਾ ਦਾ ਉਦੇਸ਼ ਜ਼ਮੀਨੀ ਪੱਧਰ ‘ਤੇ ਪਾਰਟੀ ਵਰਕਰਾਂ ‘ਚ ਊਰਜਾ ਭਰਨਾ ਵੀ ਹੈ। ਇੱਕ ਵਿਸ਼ੇਸ਼ ਮੁਹਿੰਮ ਬੱਸ ਤਿਆਰ ਕੀਤੀ ਜਾ ਰਹੀ ਹੈ ਤੇ ਪੰਜਾਬ ਤੇ ਲੋਕਾਂ ‘ਤੇ ਕੇਂਦ੍ਰਿਤ ਇੱਕ ਨਵੇਂ ਚੋਣ ਨਾਅਰੇ ਬਾਰੇ ਵੀ ਵਿਚਾਰ ਚੱਲ ਰਿਹਾ ਹੈ। ਪਾਰਟੀ ਆਗੂ ਯਾਤਰਾ ਲਈ ਤਿੰਨ ਸੰਭਾਵਿਤ ਸ਼ੁਰੂਆਤੀ ਪੁਆਇੰਟਸ ‘ਤੇ ਵੀ ਵਿਚਾਰ ਕਰ ਰਹੇ ਹਨ, ਜੋ ਕਿ ਸ੍ਰੀ ਆਨੰਦਪੁਰ ਸਾਹਿਬ, ਸ੍ਰੀ ਅੰਮ੍ਰਿਤਸਰ ਸਾਹਿਬ ਤੇ ਤਲਵੰਡੀ ਸਾਬੋ ਹਨ। ਸੂਤਰਾਂ ਮੁਤਾਬਕ, ਪਾਰਟੀ ਮਾਲਵਾ ਖੇਤਰ ‘ਤੇ ਧਿਆਨ ਕੇਂਦਰਿਤ ਹੋਣ ਕਾਰਨ ਤਲਵੰਡੀ ਸਾਬੋ ਨੂੰ ਤਰਜੀਹ ਦਿੱਤੀ ਜਾ ਸਕਦੀ ਹੈ।
ਇਹ ਮੁਹਿੰਮ ਦੇ ਅੰਤਮ ਪੜਾਅ ‘ਚ ਇੱਕ ਵੱਡੀ ਜਨਤਕ ਰੈਲੀ ਹੋਵੇਗੀ। ਇਹ ਪਹਿਲ ਜੁਲਾਈ ਦੇ ਪਹਿਲੇ ਹਫ਼ਤੇ ਸ਼ੁਰੂ ਹੋਣ ਦੀ ਉਮੀਦ ਹੈ, ਹਾਲਾਂਕਿ ਅੰਤਿਮ ਤਰੀਕਾਂ ਦੀ ਪੁਸ਼ਟੀ ਅਜੇ ਬਾਕੀ ਹੈ। ਯਾਤਰਾ ਦਾ ਮੁੱਖ ਉਦੇਸ਼ ਵਰਕਰਾਂ ਦੇ ਮਨੋਬਲ ਨੂੰ ਵਧਾਉਣਾ, ਪੇਂਡੂ ਖੇਤਰਾਂ ‘ਚ ਸੰਗਠਨਾਤਮਕ ਮੌਜੂਦਗੀ ਨੂੰ ਮਜ਼ਬੂਤ ਕਰਨਾ ਤੇ ਚੋਣਾਂ ਤੋਂ ਪਹਿਲਾਂ ਪਾਰਟੀ ਦੀ ਇੱਕਜੁੱਟ ਤਸਵੀਰ ਪੇਸ਼ ਕਰਨਾ ਹੈ।
ਰਾਜਾ ਵੜਿੰਗ ਨੇ ਵੀ ਦਿੱਤੇ ਸਨ ਸੰਕੇਤ
ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਰਾਜਾ ਵੜਿੰਗ ਨੇ ਬੀਤੇ ਦਿਨੀਂ ਕਾਂਗਰਸ ਦੇ ਇੱਕਜੁਟ ਹੋਣ ਦੀ ਗੱਲ ਕਹੀ ਸੀ। ਉਨ੍ਹਾਂ ਨੇ ਕਿਹਾ ਕਿ ਜਲਦੀ ਹੀ ਸਾਰੇ ਪੰਜਾਬ ਚ 2-3 ਦਿਨਾਂ ਚ ਕਾਂਗਰਸ ਦੇ ਲੀਡਰ- ਚਾਹੇ ਚੰਨੀ, ਬਾਜਵਾ, ਰੰਧਾਵਾ, ਰਾਣਾ ਗੁਰਜੀਤ ਤੋਂ ਲੈ ਕੇ ਹੋਰ ਸਾਰੇ ਆਗੂ ਹੋਣ, ਉਹ ਸਾਰੇ ਇੱਕ ਗੱਡੀ ਚ ਦਿਖਣਗੇ ਤੇ ਤੁਹਾਡੇ ਜ਼ਿਲ੍ਹੇ ਚ ਜਾ ਕੇ ਤੁਹਾਡੇ ਨਾਲ ਗੱਲਬਾਤ ਕਰ ਕੇ ਜਾਣਗੇ। ਕਾਂਗਰਸ ਪ੍ਰਤੀ ਆਪਣੀ ਵਫ਼ਾਦਾਰੀ ਦੇ ਸੁਨੇਹਾ ਦਿੰਦੇ ਹੋਏ, ਉਨ੍ਹਾਂ ਨੇ ਕਿਹਾ ਕਿ ਮੈਂ ਜਿੰਨੇ ਵੀ ਲੀਡਰਾਂ ਦਾ ਨਾਮ ਲਿਆ ਹੈ, ਉਹ ਸਾਰੇ ਮੇਰੇ ਨਾਲੋਂ ਕਾਬਿਲ ਹੈ। ਮੈਨੂੰ ਚੌਕੀਦਾਰ ਵਾਲੀ ਡਿਊਟੀ ਦਿੱਤੀ ਗਈ ਹੈ ਤੇ ਮੈਂ ਨਿਭਾ ਰਿਹਾ ਹਾਂ। ਜੇਕਰ ਮੇਰੇ ਕੋਲੋਂ ਉਹ ਡਿਊਟੀ ਲੈ ਵੀ ਲਈ ਜਾਵੇ ਤਾਂ ਵੀ ਮੈਂ ਕਾਂਗਰਸ ਦਾ ਝੰਡਾ ਚੱਕ ਕੇ ਪਿੰਡੋ-ਪਿੰਡੀ ਤੁਰਿਆਂ ਫਿਰਾਂਗਾ, ਕਿਉਂਕਿ ਸਰਕਾਰ ਵਾਪਸ ਲੈ ਕੇ ਆਉਣੀ ਹੈ।
