ਫਲਾਂ ਨੂੰ ਬਣਾਉਟੀ ਢੰਗ ਨਾਲ ਪਕਾਉਣ ਲਈ ਬਹੁਤ ਸਾਰੇ ਵਿਕਲਪ ਹਨ। ਜੇਕਰ ਤੁਸੀਂ ਪੇਂਡੂ ਖੇਤਰ ਤੋਂ ਆਉਂਦੇ ਹੋ ਤਾਂ ਤੁਸੀਂ ਬਚਪਨ ‘ਚ ਤੂੜੀ ਦੇ ਢੇਰ ‘ਚ ਅੰਬ ਵਰਗਾ ਫਲ ਪਕਾਇਆ ਹੋਵੇਗਾ। ਪਰ, ਵੱਡੇ ਪੱਧਰ ‘ਤੇ ਫਲ ਪਕਾਉਣ ਲਈ ਅਮੂਮਨ ਕੈਮੀਕਲ ਦਾ ਇਸਤੇਮਾਲ ਹੁੰਦਾ ਹੈ। ਇਨ੍ਹਾਂ ਵਿੱਚੋਂ ਕੁਝ ਕਾਫ਼ੀ ਖ਼ਤਰਨਾਕ ਹਨ, ਜੋ ਘਾਤਕ ਬਿਮਾਰੀਆਂ ਦਾ ਕਾਰਨ ਵੀ ਬਣ ਸਕਦੇ ਹਨ। ਇਨ੍ਹਾਂ ਵਿੱਚੋਂ ਇਕ ਕੈਲਸ਼ੀਅਮ ਕਾਰਬਾਈਡ ਹੈ। ਭਾਰਤ ਦੇ ਫੂਡ ਰੈਗੂਲੇਟਰ ਫੂਡ ਸੇਫਟੀ ਐਂਡ ਸਟੈਂਡਰਡ ਅਥਾਰਟੀ ਆਫ ਇੰਡੀਆ (FSSAI) ਨੇ ਵਪਾਰੀਆਂ ਤੇ ਫੂਡ ਬਿਜ਼ਨੈੱਸ ਆਪਰੇਟਰਾਂ ਨੂੰ ਫਲਾਂ ਨੂੰ ਪਕਾਉਣ ‘ਚ ‘ਜ਼ਹਿਰੀਲੇ ਕੈਮੀਕਲ’ ਕੈਲਸ਼ੀਅਮ ਕਾਰਬਾਈਡ ਦੀ ਵਰਤੋਂ ਨਾ ਕਰਨ ਲਈ ਸਖ਼ਤ ਹਦਾਇਤਾਂ ਦਿੱਤੀਆਂ ਹਨ। ਇਹ ਸਿਹਤ ਲਈ ਕਾਫੀ ਹਾਨੀਕਾਰਕ ਹੋ ਸਕਦਾ ਹੈ। ਸਿਹਤ ਮਾਹਿਰਾਂ ਦਾ ਮੰਨਣਾ ਹੈ ਕਿ ਕੈਲਸ਼ੀਅਮ ਕਾਰਬਾਈਡ ਨਾਲ ਪਕਾਏ ਫਲ ਖਾਣ ਨਾਲ ਲਿਵਰ ਤੇ ਕਿਡਨੀ ਨੂੰ ਨੁਕਸਾਨ ਹੋ ਸਕਦਾ ਹੈ। ਇਸ ਤੋਂ ਇਲਾਵਾ ਕੈਂਸਰ ਦਾ ਖ਼ਤਰਾ ਵੀ ਰਹਿੰਦਾ ਹੈ।FSSAI ਦਾ ਇਹ ਨਿਰਦੇਸ਼ ਦੁਨੀਆ ਭਰ ‘ਚ ਭਾਰਤੀ ਮਸਾਲਿਆਂ ‘ਤੇ ਉੱਠ ਰਹੇ ਸਵਾਲਾਂ ਦੌਰਾਨ ਆਇਆ ਹੈ। ਕਈ ਦੇਸ਼ਾਂ ਨੇ ਭਾਰਤੀ ਮਸਾਲਿਆਂ ਦੀ ਗੁਣਵੱਤਾ ‘ਤੇ ਸਵਾਲ ਉਠਾਏ ਹਨ। ਉਨ੍ਹਾਂ ਦਾ ਦੋਸ਼ ਹੈ ਕਿ ਇਸ ਵਿਚ ਐਥੀਲੀਨ ਆਕਸਾਈਡ ਦੀ ਮਿਲਾਵਟ ਹੁੰਦੀ ਹੈ ਜੋ ਕੈਂਸਰ ਦਾ ਕਾਰਨ ਬਣ ਸਕਦੀ ਹੈ। ਇਹੀ ਕਾਰਨ ਹੈ ਕਿ FSSAI ਹੁਣ ਭੋਜਨ ‘ਚ ਮਿਲਾਵਟ ਜਾਂ ਮਿਲਾਵਟ ਵਿਰੁੱਧ ਆਪਣੀ ਸਖ਼ਤੀ ਵਧਾ ਰਿਹਾ ਹੈ। ਕੈਲਸ਼ੀਅਮ ਕਾਰਬਾਈਡ ਨਾਲ ਸਬੰਧਤ ਤਾਜ਼ਾ ਨਿਰਦੇਸ਼ ਇਸ ਦਾ ਸੰਕੇਤ ਮੰਨਿਆ ਜਾ ਰਿਹਾ ਹੈ।ਭਾਰਤ ਕੇਲਾ, ਪਪੀਤਾ ਤੇ ਅੰਬ ਵਰਗੇ ਫਲਾਂ ਦਾ ਸਭ ਤੋਂ ਵੱਡਾ ਉਤਪਾਦਕ ਹੈ। ਇਹ ਵੱਡੇ ਪੱਧਰ ‘ਤੇ ਫਲਾਂ ਦੀ ਬਰਾਮਦ ਵੀ ਕਰਦਾ ਹੈ। ਭਾਰਤ ਨੇ ਵਿੱਤੀ ਸਾਲ 2022-23 ਦੌਰਾਨ 674,291.70 ਮੀਟ੍ਰਿਕ ਟਨ ਤਾਜ਼ੇ ਫਲਾਂ ਦੀ ਬਰਾਮਦ ਕੀਤੀ। ਉਨ੍ਹਾਂ ਦੀ ਕੁੱਲ ਕੀਮਤ $339 ਮਿਲੀਅਨ ਸੀ। ਭਾਰਤੀ ਫਲਾਂ ਦੇ ਸਭ ਤੋਂ ਵੱਡੇ ਖਰੀਦਦਾਰ ਸੰਯੁਕਤ ਅਰਬ ਅਮੀਰਾਤ, ਬੰਗਲਾਦੇਸ਼, ਈਰਾਨ, ਇਰਾਕ ਤੇ ਨੇਪਾਲ ਸਨ। ਭਾਰਤੀ ਫਲਾਂ ‘ਚ ਇਕੱਲੇ ਅੰਬ ਦਾ ਹਿੱਸਾ ਲਗਭਗ 50 ਮਿਲੀਅਨ ਡਾਲਰ ਸੀ। ਇਸ ਨੂੰ ਜ਼ਿਆਦਾਤਰ ਯੂਏਈ, ਬ੍ਰਿਟੇਨ ਤੇ ਅਮਰੀਕਾ ਵਰਗੇ ਦੇਸ਼ਾਂ ਨੇ ਖਰੀਦਿਆ ਸੀ।