ਬਘੇਲ ਸਿੰਘ ਜਾਤੀਵਾਲ ਸ਼੍ਰੋਮਣੀ ਅਕਾਲੀ ਦਲ ਦੇ ਕੌਮੀ ਮੀਤ ਪ੍ਰਧਾਨ ਬਣੇ

 ਸ੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਵੱਲੋਂ ਉੱਘੇ ਕਾਰੋਬਾਰੀ ਤੇ ਭਾਦਸੋਂ ਇਲਾਕੇ ‘ਚ ਸਮਾਜਸੇਵੀ ਵਜੋਂ ਮਕਬੂਲ ਸਖਸ਼ੀਅਤ ਬਘੇਲ ਸਿੰਘ ਜਾਤੀਵਾਲ ਨੂੰ ਪਾਰਟੀ ਦਾ ਕੌਮੀ ਮੀਤ ਪ੍ਰਧਾਨ ਨਿਯੁਕਤ ਕੀਤਾ ਗਿਆ ਹੈ । ਪਾਰਟੀ ਪ੍ਰਧਾਨ ਵੱਲੋਂ ਕੀਤੀ ਇਸ ਨਿਯੁਕਤੀ ਦਾ ਪੱਤਰ ਸਾਬਕਾ ਮੰਤਰੀ ਸੁਰਜੀਤ ਸਿੰਘ ਰੱਖੜਾ, ਪਟਿਆਲਾ ਲੋਕ ਸਭਾ ਤੋਂ ਪਾਰਟੀ ਉਮੀਦਵਾਰ ਐਨ.ਕੇ.ਸ਼ਰਮਾ, ਸ੍ਰੋਮਣੀ ਕਮੇਟੀ ਮੈਂਬਰ ਸਤਵਿੰਦਰ ਸਿੰਘ ਟੌਹੜਾ ਤੇ ਹਲਕਾ ਇੰਚਾਰਜ਼ ਮੱਖਣ ਸਿੰਘ ਲਾਲਕਾ ਨੇ ਪਿੰਡ ਟੌਹੜਾ ਵਿੱਖੇ ਕਰਵਾਈ ਇਕ ਮੀਟਿੰਗ ਦੌਰਾਨ ਬਘੇਲ ਸਿੰਘ ਜਾਤੀਵਾਲ ਨੂੰ ਸੌਪਿਆ । ਨਿਯੁਕਤੀ ਪੱਤਰ ਸੌਂਪਦਿਆਂ ਸੁਰਜੀਤ ਸਿੰਘ ਰੱਖੜਾ ਤੇ ਐਨ.ਕੇ.ਸ਼ਰਮਾ ਨੇ ਕਿਹਾ ਕਿ ਸ੍ਰੋਮਣੀ ਅਕਾਲੀ ਦਲ ਜੈਤੋ ਦੇ ਮੋਰਚੇ ਦੀਆਂ ਸ਼ਹਾਦਤਾਂ ‘ਚੋਂ ਉਪਜੀ ਪੰਜਾਬੀਆਂ ਦੀ ਮਾਂ ਪਾਰਟੀ ਹੈ ਜਿਸ ਦੇ ਬਘੇਲ ਸਿੰਘ ਜਾਤੀਵਾਲ ਵਰਗੇ ਵਫਾਦਾਰ ਤੇ ਪੰਥ ਪ੍ਰਸ਼ਤ ਆਗੂ ਰੀੜ ਦੀ ਹੱਡੀ ਹਨ । ਅਜਿਹੇ ਵਿੱਚ ਉਨ੍ਹਾਂ ਦੀ ਕੌਮੀ ਮੀਤ ਪ੍ਰਧਾਨ ਵਜੋਂ ਨਿਯੁਕਤੀ ਸਮੂਹ ਜੁਝਾਰੂ ਪਾਰਟੀ ਵਰਕਰਾਂ ਲਈ ਸਨਮਾਨ ਦੀ ਗੱਲ ਹੈ ।ਸ੍ਰੋਮਣੀ ਕਮੇਟੀ ਮੈਂਬਰ ਸਤਵਿੰਦਰ ਸਿੰਘ ਟੌਹੜਾ ਤੇ ਹਲਕਾ ਇੰਚਾਰਜ਼ ਮੱਖਣ ਸਿੰਘ ਲਾਲਕਾ ਨੇ ਕਿਹਾ ਕਿ ਬਘੇਲ ਸਿੰਘ ਜਾਤੀਵਾਲ ਪੰਥ ਰਤਨ ਜਥੇਦਾਰ ਗੁਰਚਰਨ ਸਿੰਘ ਟੌਹੜਾ ਦੇ ਉਨ੍ਹਾਂ ਅਤਿ ਨਿਕਟਵਰਤੀਆਂ ‘ਚ ਸ਼ਾਮਿਲ ਹਨ ਜੋ ਹਰੇਕ ਸਿਆਸੀ ਹਨੇਰੀ ਵਿੱਚ ਸ੍ਰੋਮਣੀ ਅਕਾਲੀ ਦਲ ਨਾਲ ਸੱਚੇ ਸਿਪਾਹੀ ਵਾਂਗ ਅਡੋਲ ਖੜੇ ਰਹੇ ਤੇ ਪਾਰਟੀ ਲਈ ਜਮੀਨੀ ਪੱਧਰ ‘ਤੇ ਸ਼ਾਨਦਾਰ ਕੰਮ ਕੀਤਾ। ਇਸ ਮੌਕੇ ਨਵ ਨਿਯੁਕਤ ਕੌਮੀ ਮੀਤ ਪ੍ਰਧਾਨ ਬਘੇਲ ਸਿੰਘ ਨੇ ਪਾਰਟੀ ਪ੍ਰਧਾਨ ਤੇ ਸੀਨੀਅਰ ਲੀਡਰਸਿੱਪ ਦਾ ਧੰਨਵਾਦ ਕਰਦਿਆਂ ਸ੍ਰੋਮਣੀ ਅਕਾਲੀ ਦਲ ਲਈ ਹੋਰ ਵੀ ਸ਼ਿੱਦਤ ਨਾਲ ਸੇਵਾਵਾਂ ਜਾਰੀ ਰੱਖਣ ਦੀ ਵਚਨਬੱਧਤਾ ਦੋਹਰਾਈ ।