Dhanteras ਦੇ ਮੌਕੇ ‘ਤੇ 80 ਹਜ਼ਾਰ ਪਾਰ ਪਹੁੰਚਿਆ ਸੋਨਾ, ਫਿਰ ਵੀ ਲੋਕਾਂ ‘ਚ ਉਤਸਾਹ ਬਰਕਰਾਰ

10 ਸਾਲਾਂ ‘ਚ ਸੋਨੇ ਦੀ ਕੀਮਤ ‘ਚ ਤਿੰਨ ਗੁਣਾ ਵਾਧਾ

ਗਹਿਣਾ ਬਾਜ਼ਾਰ ਨੇ ਪਹਿਲਾਂ ਹੀ ਐਲਾਨ ਕਰ ਦਿੱਤਾ ਸੀ ਕਿ ਦੀਵਾਲੀ ਤਕ ਸੋਨੇ ਦੀ ਕੀਮਤ 80 ਹਜ਼ਾਰ ਰੁਪਏ ਪ੍ਰਤੀ ਦਸ ਗ੍ਰਾਮ ਤਕ ਪਹੁੰਚ ਜਾਵੇਗੀ। ਦੀਵਾਲੀ ਤੋਂ ਪਹਿਲਾਂ ਹੀ ਇਹ 80,000 ਤਕ ਪਹੁੰਚ ਵੀ ਗਿਆ ਹੈ। ਚਾਂਦੀ ਦਾ ਰੇਟ 99 ਹਜ਼ਾਰ ਰੁਪਏ ਪ੍ਰਤੀ ਕਿਲੋਗ੍ਰਾਮ ‘ਤੇ ਪਹੁੰਚ ਗਿਆ ਹੈ। ਦੀਵਾਲੀ ਅਤੇ ਧਨਤੇਰਸ ‘ਤੇ ਗਿੰਨੀ ਦੀ ਕਾਫੀ ਸੇਲ ਹੁੰਦੀ ਹੈ।

ਗਿੰਨੀ ਦਾ ਰੇਟ 61 ਹਜ਼ਾਰ 600 ਰੁਪਏ ਪ੍ਰਤੀ ਦਸ ਗ੍ਰਾਮ ਹੈ। ਵਿਕਰੇਤਾਵਾਂ ਨੇ ਧਨਤੇਰਸ ਤੇ ਦੀਵਾਲੀ ਲਈ ਪਹਿਲਾਂ ਤੋਂ ਗਹਿਣੇ ਵੀ ਤਿਆਰ ਕਰ ਲਏ ਹਨ। ਪਿਛਲੇ ਦਸ ਸਾਲਾਂ ‘ਚ ਸੋਨੇ ਦੀ ਕੀਮਤ ਤਿੰਨ ਗੁਣਾ ਵਧੀ ਹੈ। ਇਕ ਮਹੀਨੇ ‘ਚ ਸੋਨੇ ਦੀ ਕੀਮਤ ‘ਚ 6,000 ਰੁਪਏ ਪ੍ਰਤੀ ਦਸ ਗ੍ਰਾਮ ਦਾ ਵਾਧਾ ਹੋਇਆ ਹੈ, ਜਿਸ ਦੇ ਬਾਵਜੂਦ ਸਰਾਫਾ ਬਾਜ਼ਾਰ ਦੀ ਚਮਕ ਲਗਾਤਾਰ ਵਧ ਰਹੀ ਹੈ।

ਦੀਵਾਲੀ ਤੋਂ ਪਹਿਲਾਂ ਹੀ 24 ਕੈਰੇਟ ਸੋਨੇ ਦਾ ਭਾਅ 80 ਹਜ਼ਾਰ ਰੁਪਏ ਨੂੰ ਪਾਰ ਕਰ ਗਿਆ ਹੈ। ਸਰਾਫਾ ਬਾਜ਼ਾਰ ਦੇ ਇਤਿਹਾਸ ‘ਚ ਕਦੇ ਵੀ ਇੰਨਾ ਜ਼ਿਆਦਾ ਨਹੀਂ ਹੋਇਆ ਹੈ ਕਿ ਤਿਉਹਾਰ ਤੋਂ ਬਾਅਦ ਵਿਆਹਾਂ ਦਾ ਸੀਜ਼ਨ ਸ਼ੁਰੂ ਹੋਣ ਵਾਲਾ ਹੈ।

-ਸੰਜੇ ਸਹਿਗਲ, ਜਨਰਲ ਸਕੱਤਰ, ਚੰਡੀਗੜ੍ਹ ਜਿਊਲਰਜ਼ ਐਸੋਸੀਏਸ਼ਨ

ਸੋਨੇ ‘ਚ ਨਿਵੇਸ਼ ਨੂੰ ਸੁਰੱਖਿਅਤ ਮੰਨ ਰਹੇ ਲੋਕ

ਤਿਉਹਾਰਾਂ ਦੇ ਸੀਜ਼ਨ ਤੋਂ ਬਾਅਦ ਨਵੰਬਰ ਤੇ ਦਸੰਬਰ ‘ਚ ਵਿਆਹਾਂ ਦਾ ਸੀਜ਼ਨ ਵੀ ਸ਼ੁਰੂ ਹੋ ਜਾਵੇਗਾ, ਇਸ ਲਈ ਸੋਨੇ ਦੇ ਗਹਿਣਿਆਂ ਦੀ ਬੁਕਿੰਗ ਵੀ ਹੋ ਰਹੀ ਹੈ। ਸੋਨੇ ਦੇ ਗਹਿਣੇ 22 ਕੈਰੇਟ ਦੇ ਬਣੇ ਹੁੰਦੇ ਹਨ। 22 ਕੈਰੇਟ ਪ੍ਰਤੀ ਦਸ ਗ੍ਰਾਮ ਦਾ ਰੇਟ 24 ਕੈਰੇਟ ਦੇ ਮੁਕਾਬਲੇ ਪੰਜ ਹਜ਼ਾਰ ਰੁਪਏ ਘੱਟ ਹੈ।

ਟ੍ਰਾਈਸਿਟੀ ਦੇ ਲੋਕ ਜਾਇਦਾਦ ਦੇ ਨਾਲ-ਨਾਲ ਸੋਨੇ ‘ਚ ਨਿਵੇਸ਼ ਨੂੰ ਵਧੇਰੇ ਸੁਰੱਖਿਅਤ ਮੰਨਦੇ ਹਨ। ਪਿਛਲੇ ਇਕ ਸਾਲ ‘ਚ ਸੋਨੇ ਦੀ ਕੀਮਤ ‘ਚ 20 ਹਜ਼ਾਰ ਰੁਪਏ ਪ੍ਰਤੀ ਦਸ ਗ੍ਰਾਮ ਦਾ ਵਾਧਾ ਹੋਇਆ ਹੈ। ਇਕ ਸਾਲ ‘ਚ ਇੰਨਾ ਵਾਧਾ ਪਹਿਲਾਂ ਕਦੇ ਨਹੀਂ ਹੋਇਆ ਸੀ।