ਜਦੋਂ ਦੀਪਿਕਾ ਛੋਟੀ ਸੀ, ਉਸਦੇ ਪਿਤਾ ਉਸਨੂੰ ਹਿਸਾਰ ਦੇ ਕੁਸ਼ਤੀ ਕੇਂਦਰ ਵਿੱਚ ਲੈ ਜਾਂਦੇ ਸਨ
ਭਾਰਤੀ ਮਹਿਲਾ ਹਾਕੀ ਟੀਮ ਨੇ ਜਦੋਂ ਏਸ਼ੀਅਨ ਚੈਂਪੀਅਨਜ਼ ਟਰਾਫੀ ਦੇ ਫਾਈਨਲ ’ਚ ਚੀਨ ਨੂੰ ਹਰਾ ਕੇ ਲਗਾਤਾਰ ਦੂਜੀ ਵਾਰ ਸ਼ਾਨਦਾਰ ਟਰਾਫੀ ਜਿੱਤੀ ਤਾਂ ਇਸ ਦੀ ਸੂਤਰਧਾਰ ਨੌਜਵਾਨ ਸਟ੍ਰਾਈਕਰ ਦੀਪਿਕਾ ਬਣੀ, ਜਿਸਨੇ ਮੈਚ ’ਚ ਇੱਕੋ ਇੱਕ ਅਤੇ ਜੇਤੂ ਗੋਲ ਕੀਤਾ।
ਹਰਿਆਣਾ ਦੇ ਹਿਸਾਰ ਦੀ ਰਹਿਣ ਵਾਲੀ ਇਹ ਖਿਡਾਰਨ ਪੂਰੇ ਟੂਰਨਾਮੈਂਟ ਵਿੱਚ ਚੈਂਪੀਅਨ ਵਾਂਗ ਖੇਡੀ ਅਤੇ 11 ਗੋਲ ਕਰ ਕੇ ਟੂਰਨਾਮੈਂਟ ਦੀ ਟਾਪ ਸਕੋਰਰ ਵੀ ਬਣੀ। ਭਾਰਤ ਦੀ ਇਤਿਹਾਸਕ ਜਿੱਤ ਤੋਂ ਬਾਅਦ ਹਾਕੀ ਇੰਡੀਆ ਨੇ ਖੁਦ ਦੀਪਿਕਾ ਨੂੰ ਗੋਲਡਨ ਗਰਲ ਕਿਹਾ ਸੀ।
ਪਹਿਲੇ ਹਾਫ ‘ਚ ਮੈਚ ਗੋਲ ਰਹਿਤ ਰਹਿਣ ਤੋਂ ਬਾਅਦ ਲਾਲਰੇਮਿਸਆਮੀ ਨੇ ਦੂਜੇ ਹਾਫ ਦੇ ਪਹਿਲੇ ਹੀ ਮਿੰਟ ‘ਚ ਭਾਰਤ ਨੂੰ ਪੈਨਲਟੀ ਕਾਰਨਰ ਦਿਵਾਇਆ।
ਪਹਿਲਾ ਸ਼ਾਟ ਖੁੰਝ ਗਿਆ, ਪਰ ਗੇਂਦ ਸਰਕਲ ਦੇ ਅੰਦਰ ਸੀ ਅਤੇ ਨਵਨੀਤ ਦੀ ਸਟਿੱਕ ਤੋਂ ਹਟ ਕੇ ਦੀਪਿਕਾ ਤੱਕ ਪਹੁੰਚ ਗਈ, ਜਿਸ ਨੇ ਸ਼ਾਨਦਾਰ ਫਲਿੱਕ ਨਾਲ ਇਸ ਨੂੰ ਗੋਲ ਵਿੱਚ ਪਾ ਦਿੱਤਾ ਅਤੇ ਭਾਰਤ ਨੂੰ ਇੱਕ ਵਾਰ ਫਿਰ ਜੇਤੂ ਬਣਾਇਆ।
ਕੁਸ਼ਤੀ ’ਚ ਨਹੀਂ ਲੱਗਾ ਮਨ ਤਾਂ ਚੁੱਕੀ ਹਾਕੀ ਸਟਿੱਕ
ਜਦੋਂ ਦੀਪਿਕਾ ਛੋਟੀ ਸੀ, ਉਸਦੇ ਪਿਤਾ ਉਸਨੂੰ ਹਿਸਾਰ ਦੇ ਕੁਸ਼ਤੀ ਕੇਂਦਰ ਵਿੱਚ ਲੈ ਜਾਂਦੇ ਸਨ, ਜਿੱਥੇ ਉਸਦਾ ਭਰਾ ਸਿਖਲਾਈ ਲੈਂਦਾ ਸੀ। ਦੀਪਿਕਾ, ਮੂਲ ਰੂਪ ਵਿੱਚ ਰੋਹਤਕ ਦੇ ਨੇੜੇ ਇੱਕ ਪਿੰਡ ਦੀ ਰਹਿਣ ਵਾਲੀ ਸੀ, ਪਰ ਪਹਿਲਵਾਨਾਂ ਦੇ ਇੱਕ ਪਰਿਵਾਰ ਨਾਲ ਸਬੰਧ ਰੱਖਦੀ ਸੀ, ਪਰ ਉਸਨੂੰ ਕੁਸ਼ਤੀ ਵਿੱਚ ਕਦੇ ਦਿਲਚਸਪੀ ਨਹੀਂ ਸੀ।
ਇੱਕ ਦਿਨ, ਸੈਂਟਰ ਤੋਂ ਬਾਹਰ ਆ ਕੇ, ਉਸਨੇ ਹਾਕੀ ਦੇਖਣੀ ਸ਼ੁਰੂ ਕਰ ਦਿੱਤੀ ਅਤੇ ਉਥੇ ਕੋਚ ਆਜ਼ਾਦ ਸਿੰਘ ਨੇ ਉਸਨੂੰ ਦੇਖਿਆ। ਕੋਚ ਨੇ ਦੀਪਿਕਾ ਤੋਂ ਪੁੱਛਿਆ ਕਿ ਕੀ ਉਹ ਹਾਕੀ ਖੇਡਣਾ ਚਾਹੁੰਦੀ ਹੈ ਤਾਂ ਦੀਪਿਕਾ ਨੇ ਹਾਂ ਕਿਹਾ।
ਇਸ ਤੋਂ ਬਾਅਦ ਉਸ ਨੇ ਉਸ ਨੂੰ ਹਾਕੀ ਦਿੱਤੀ ਅਤੇ ਦੀਪਿਕਾ ਨੇ ਇਸ ਖੇਡ ਨੂੰ ਆਪਣਾ ਟੀਚਾ ਬਣਾ ਲਿਆ। ਅੱਜ ਉਸ ਨੂੰ ਹਾਕੀ ਸਟਿੱਕ ਫੜਨਾ ਕੰਮ ਆਇਆ ਅਤੇ ਉਹ ਟੀਮ ਦੀ ਇਤਿਹਾਸਕ ਜਿੱਤ ਦੀ ਸੂਤਰਧਾਰ ਬਣ ਗਈ।
ਜਾਪਾਨ ਦੀ ਟੀਮ ਤੀਜੇ ਸਥਾਨ ‘ਤੇ ਰਹੀ
ਤੀਜੇ ਸਥਾਨ ਲਈ ਖੇਡੇ ਗਏ ਮੈਚ ਵਿੱਚ ਜਾਪਾਨ ਨੇ ਮਲੇਸ਼ੀਆ ਨੂੰ ਹਰਾ ਦਿੱਤਾ। ਦੋ ਵਾਰ ਦੀ ਚੈਂਪੀਅਨ ਟੀਮ ਜਾਪਾਨ ਨੇ ਮਲੇਸ਼ੀਆ ਨੂੰ 4-1 ਨਾਲ ਹਰਾਇਆ।
ਇਸ ਤਰ੍ਹਾਂ ਜਾਪਾਨ ਤੀਜੇ, ਮਲੇਸ਼ੀਆ ਚੌਥੇ, ਕੋਰੀਆ ਪੰਜਵੇਂ ਅਤੇ ਥਾਈਲੈਂਡ ਛੇਵੇਂ ਸਥਾਨ ‘ਤੇ ਰਿਹਾ। ਮੈਚ ਵਿੱਚ ਜਾਪਾਨ ਨੂੰ ਅੱਠ ਅਤੇ ਮਲੇਸ਼ੀਆ ਨੂੰ ਦੋ ਪੈਨਲਟੀ ਕਾਰਨਰ ਮਿਲੇ। ਜਾਪਾਨ ਨੇ ਪੈਨਲਟੀ ਕਾਰਨਰ ਤੋਂ ਦੋ ਗੋਲ ਕੀਤੇ। ਮੈਚ ਵਿੱਚ ਮੈਦਾਨ ਤੋਂ ਤਿੰਨ ਗੋਲ ਕੀਤੇ ਗਏ। ਇਸ ਵਿੱਚ ਦੋ ਜਪਾਨ ਨੇ ਅਤੇ ਇੱਕ ਮਲੇਸ਼ੀਆ ਨੇ ਕੀਤਾ।
