ਮੈਚ ਦੇ ਚੌਥੇ ਦਿਨ ਇੰਗਲੈਂਡ ਆਸਾਨੀ ਨਾਲ ਜਿੱਤ ਵੱਲ ਵਧਦਾ ਦਿਖਾਈ ਦੇ ਰਿਹਾ ਸੀ।
20 ਜੂਨ ਨੂੰ, ਜਦੋਂ ਹੈਡਿੰਗਲੇ ਦੇ ਮੈਦਾਨ ‘ਤੇ ਪਹਿਲੀ ਗੇਂਦ ਸੁੱਟੀ ਗਈ ਸੀ, ਤਾਂ ਸ਼ਾਇਦ ਹੀ ਕਿਸੇ ਨੇ ਸੋਚਿਆ ਹੋਵੇਗਾ ਕਿ ਭਾਰਤ ਤੇ ਇੰਗਲੈਂਡ ਵਿਚਕਾਰ ਟੈਸਟ ਸੀਰੀਜ਼ ਦਾ ਫੈਸਲਾ ਬਿਲਕੁਲ ਅੰਤ ‘ਚ ਹੋਵੇਗਾ। ਨਵੇਂ ਕਪਤਾਨ ਸ਼ੁਭਮਨ ਗਿੱਲ ਦੀ ਅਗਵਾਈ ਹੇਠ, ਘੱਟ ਅਨੁਭਵੀ ਟੀਮ ਇੰਡੀਆ ਨੇ ਮੇਜ਼ਬਾਨ ਇੰਗਲੈਂਡ ਨੂੰ ਸਖ਼ਤ ਟੱਕਰ ਦੇ ਕੇ ਨਾ ਸਿਰਫ਼ ਪਰੇਸ਼ਾਨ ਕੀਤਾ, ਸੀਰੀਜ਼ ਬਰਾਬਰ ਕਰਨ ਦੀਆਂ ਉਮੀਦਾਂ ਨੂੰ ਵੀ ਜ਼ਿੰਦਾ ਰੱਖਿਆ। ਟੀਮ ਇੰਡੀਆ ਦੇ ਲੜਾਕੂ ਪ੍ਰਦਰਸ਼ਨ ਦਾ ਨਤੀਜਾ ਇਹ ਨਿਕਲਿਆ ਕਿ ਇਸ ਟੈਸਟ ਸੀਰੀਜ਼ ਦਾ ਫੈਸਲਾ 25ਵੇਂ ਦਿਨ ਹੋਵੇਗਾ। ਹਾਂ, ਓਵਲ ਟੈਸਟ ਮੈਚ ਦੇ ਚੌਥੇ ਦਿਨ ਹੋਏ ਡਰਾਮੇ ਕਾਰਨ, ਇਸ ਮੈਚ ਤੇ ਸੀਰੀਜ ਦਾ ਫੈਸਲਾ ਆਖਰੀ ਦਿਨ ਤੱਕ ਪਹੁੰਚ ਗਿਆ ਹੈ।
ਓਵਲ ਟੈਸਟ ਮੈਚ ਦੇ ਚੌਥੇ ਦਿਨ, ਇੰਗਲੈਂਡ ਨੂੰ ਜਿੱਤਣ ਲਈ 324 ਦੌੜਾਂ ਦੀ ਲੋੜ ਸੀ, ਜਦੋਂ ਕਿ ਟੀਮ ਇੰਡੀਆ ਨੂੰ 9 ਵਿਕਟਾਂ ਦੀ ਲੋੜ ਸੀ। ਜਿਸ ਤਰ੍ਹਾਂ ਟੀਮ ਇੰਡੀਆ ਨੇ ਪਹਿਲੇ ਸੈਸ਼ਨ ‘ਚ 2 ਵਿਕਟਾਂ ਲਈਆਂ, ਉਸ ਤੋਂ ਲੱਗਦਾ ਸੀ ਕਿ ਇਹ ਮੈਚ ਉਸੇ ਦਿਨ ਖਤਮ ਹੋ ਜਾਵੇਗਾ ਤੇ ਟੀਮ ਇੰਡੀਆ ਸੀਰੀਜ਼ ਬਰਾਬਰ ਕਰ ਲਵੇਗੀ। ਪਰ ਇਸ ਤੋਂ ਬਾਅਦ ਹੈਰੀ ਬਰੂਕ ਤੇ ਜੋ ਰੂਟ ਨੇ ਧਮਾਕੇਦਾਰ ਸੈਂਕੜੇ ਲਗਾਏ ਤੇ ਇੰਗਲੈਂਡ ਨੂੰ ਜਿੱਤ ਦੇ ਨੇੜੇ ਲੈ ਆਏ। ਇੱਕ ਵਾਰ ਫਿਰ ਮੈਚ ਚੌਥੇ ਦਿਨ ਹੀ ਖਤਮ ਹੁੰਦਾ ਦਿਖਾਈ ਦੇ ਰਿਹਾ ਸੀ। ਪਰ ਤੀਜੇ ਸੈਸ਼ਨ ‘ਚ ਇੱਕ ਘੰਟੇ ਦੇ ਖੇਡ ਤੋਂ ਬਾਅਦ ਹੋਏ ਡਰਾਮੇ ਨੇ ਸਭ ਕੁਝ ਬਦਲ ਦਿੱਤਾ।
ਓਵਲ ‘ਚ ਆਖਿਰੀ ਸੈਸ਼ਨ ‘ਚ ਡਰਾਮਾ
ਮੀਂਹ ਕਾਰਨ ਤੀਜਾ ਸੈਸ਼ਨ ਥੋੜ੍ਹਾ ਦੇਰੀ ਨਾਲ ਸ਼ੁਰੂ ਹੋਇਆ ਤੇ ਜੋ ਰੂਟ ਨੇ ਆਪਣਾ ਸੈਂਕੜਾ ਪੂਰਾ ਕੀਤਾ। ਇਸ ਸਮੇਂ ਜੈਕਬ ਬੈਥਲ ਉਨ੍ਹਾਂ ਦੇ ਨਾਲ ਸੀ ਤੇ ਇੰਗਲੈਂਡ ਜਿੱਤ ਤੋਂ ਲਗਭਗ 40 ਦੌੜਾਂ ਦੂਰ ਸੀ। ਪਰ ਫਿਰ ਪ੍ਰਸਿਧ ਕ੍ਰਿਸ਼ਨਾ ਨੇ ਇਨ੍ਹਾਂ ਦੋਵਾਂ ਬੱਲੇਬਾਜ਼ਾਂ ਨੂੰ ਪਵੇਲੀਅਨ ਵਾਪਸ ਭੇਜ ਕੇ ਟੀਮ ਇੰਡੀਆ ਦੀ ਵਾਪਸੀ ਕਰਵਾਈ। ਇਸ ਤੋਂ ਬਾਅਦ ਭਾਰਤੀ ਗੇਂਦਬਾਜ਼ਾਂ ਨੇ ਦਬਦਬਾ ਬਣਾਇਆ ਤੇ ਇੰਗਲੈਂਡ ਨੂੰ ਹਰ ਦੌੜ ਲਈ ਸੰਘਰਸ਼ ਕਰਨਾ ਪਿਆ। ਜਦੋਂ ਇੰਗਲੈਂਡ ਦਾ ਸਕੋਰ 339 ਦੌੜਾਂ ਸੀ, ਤਾਂ ਮੈਦਾਨ ‘ਤੇ ਕਾਲੇ ਬੱਦਲ ਛਾਏ ਰਹੇ ਤੇ ਰੌਸ਼ਨੀ ਬਹੁਤ ਮੱਧਮ ਹੋ ਗਈ। ਇਸ ਦੇ ਨਾਲ ਹੀ, ਬਾਰਿਸ਼ ਸ਼ੁਰੂ ਹੋ ਗਈ ਅਤੇ ਸਾਰਿਆਂ ਨੂੰ ਪਵੇਲੀਅਨ ਵਾਪਸ ਜਾਣਾ ਪਿਆ।
ਖੇਡ ਰੋਕਣ ਸਮੇਂ, ਇੰਗਲੈਂਡ ਜਿੱਤ ਤੋਂ 35 ਦੌੜਾਂ ਦੂਰ ਸੀ, ਜਦੋਂ ਕਿ ਟੀਮ ਇੰਡੀਆ ਨੂੰ ਸਿਰਫ਼ 4 ਵਿਕਟਾਂ ਦੀ ਲੋੜ ਸੀ। ਪਰ ਮੀਂਹ ਨੇ ਖੇਡ ਰੋਕ ਦਿੱਤੀ ਅਤੇ ਫਿਰ ਲਗਭਗ 40 ਮਿੰਟਾਂ ਬਾਅਦ ਜਦੋਂ ਦੋਵੇਂ ਅੰਪਾਇਰਾਂ ਨੇ ਮੈਦਾਨ ਦਾ ਨਿਰੀਖਣ ਕੀਤਾ, ਤਾਂ ਸਿਰਫ਼ ਇੱਕ ਫੈਸਲਾ ਲਿਆ ਗਿਆ – ਦਿਨ ਦਾ ਖੇਡ ਖਤਮ ਹੋ ਗਿਆ। ਯਾਨੀ ਚੌਥੇ ਦਿਨ ਬਾਕੀ ਡੇਢ ਘੰਟੇ ਦੀ ਖੇਡ ਬਰਬਾਦ ਹੋ ਗਈ, ਜਿਸ ‘ਚ ਫੈਸਲਾ ਨਿਸ਼ਚਿਤ ਸੀ।
ਐਂਡਰਸਨ-ਤੇਂਦੁਲਕਰ ਟਰਾਫੀ ਦਾ ਫੈਸਲਾ 25ਵੇਂ ਦਿਨ ਮੁਲਤਵੀ ਕਰ ਦਿੱਤਾ ਗਿਆ
ਇਸ ਦਾ ਪ੍ਰਭਾਵ ਇਹ ਹੋਇਆ ਕਿ ਇਸ ਮੈਚ ਤੇ ਸੀਰੀਜ਼ ਦੇ ਨਤੀਜੇ ਦਾ ਇੰਤਜਾਰ ਆਖਰੀ ਦਿਨ ਯਾਨੀ 25ਵੇਂ ਦਿਨ ਤੱਕ ਕਰਨਾ ਪਵੇਗਾ। ਦਰਅਸਲ, 5 ਟੈਸਟ ਮੈਚਾਂ ਦੀ ਇਹ ਸੀਰੀਜ਼ ਪ੍ਰਸ਼ੰਸਕਾਂ ਲਈ ਪੈਸੇ ਵਸੂਲ ਸਾਬਤ ਹੋਈ। ਇਹ ਇਸ ਲਈ ਹੈ ਕਿਉਂਕਿ ਸੀਰੀਜ਼ ਦੇ ਪਿਛਲੇ ਚਾਰ ਮੈਚ 5-5 ਦਿਨ ਚੱਲੇ। ਯਾਨੀ ਕਿ ਓਵਲ ਟੈਸਟ ਤੋਂ ਪਹਿਲਾਂ, ਐਂਡਰਸਨ-ਤੇਂਦੁਲਕਰ ਟਰਾਫੀ ਦੇ ਪੂਰੇ 20 ਦਿਨ ਦੇਖੇ ਗਏ ਸਨ। ਹਾਲਾਂਕਿ ਓਵਲ ਟੈਸਟ 4 ਦਿਨਾਂ ‘ਚ ਖਤਮ ਹੁੰਦਾ ਜਾਪਦਾ ਸੀ, ਪਰ ਮੀਂਹ ਨੇ ਇਹ ਯਕੀਨੀ ਬਣਾਇਆ ਕਿ ਪਿਛਲੇ ਚਾਰ ਮੈਚਾਂ ਵਾਂਗ, ਆਖਰੀ ਮੈਚ ਤੇ ਇਸ ਲੜੀ ਦਾ ਫੈਸਲਾ ਵੀ ਆਖਰੀ ਦਿਨ ਲਿਆ ਜਾਵੇ।
