ਭਾਰਤੀ ਉਦਯੋਗ ਨੂੰ ਚੀਨ ਵੱਲੋਂ ਆਰਥਿਕ ਸੱਟ ਮਾਰਨ ਦਾ ਰੁਝਾਨ ਲਗਾਤਾਰ ਜਾਰੀ ਹੈ।
ਭਾਰਤੀ ਉਦਯੋਗ ਨੂੰ ਚੀਨ ਵੱਲੋਂ ਆਰਥਿਕ ਸੱਟ ਮਾਰਨ ਦਾ ਰੁਝਾਨ ਲਗਾਤਾਰ ਜਾਰੀ ਹੈ। ਭਾਰਤ ਸਰਕਾਰ ਦੇ ਮੇਕ ਇਨ ਇੰਡੀਆ ਦੀ ਸਫਲਤਾ ਦੇ ਦਾਅਵਿਆਂ ਦੇ ਵਿਚਕਾਰ ਚੀਨ ਤੋਂ ਦਰਾਮਦ ਦੇ ਅੰਕੜਿਆਂ ਵਿੱਚ ਲਗਾਤਾਰ ਵਾਧਾ ਹੈਰਾਨੀਜਨਕ ਹੈ। ਚੀਨ ਦੀ ਭਾਰਤ ਵਿੱਚ ਦਰਾਮਦ ਲਗਾਤਾਰ ਵੱਧ ਰਹੀ ਹੈ। ਭਾਰਤ ਵਿੱਚ ਚੀਨ ਤੋਂ ਸਾਲ 2021-22 ‘ਚ 7 ਲੱਖ 5 ਹਜ਼ਾਰ ਕਰੋੜ ਰੁਪਏ ਦੀ ਦਰਾਮਦ 2022-23 ‘ਚ ਵਧ ਕੇ 7 ਲੱਖ 91 ਹਜ਼ਾਰ ਕਰੋੜ ਅਤੇ 2023-24 ‘ਚ 8 ਲੱਖ 43 ਹਜ਼ਾਰ ਕਰੋੜ ਰੁਪਏ ਹੋ ਗਈ ਹੈ।
ਇਹ ਵਾਧਾ ਚਾਲੂ ਮਾਲੀ ਸਾਲ ਦੇ ਅਪ੍ਰੈਲ ਮਹੀਨੇ ਵਿੱਚ ਵੀ 6 ਫੀਸਦੀ ਵਧਿਆ ਹੈ। ਜਿੱਥੇ ਇੱਕ ਪਾਸੇ ਪਿਛਲੇ ਵਿੱਤੀ ਸਾਲ ਵਿੱਚ ਭਾਰਤ ਦੀ ਕੁੱਲ ਦਰਾਮਦ ਵਿੱਚ 3 ਫ਼ੀਸਦੀ ਦੀ ਕਮੀ ਆਈ ਹੈ, ਉੱਥੇ ਹੀ ਚੀਨ ਤੋਂ ਦਰਾਮਦ ਵਿੱਚ ਸੱਤ ਫ਼ੀਸਦੀ ਦਾ ਵਾਧਾ ਸਾਬਤ ਕਰਦਾ ਹੈ ਕਿ ਸਰਕਾਰ ਨੂੰ ਦੇਸ਼ ਦੇ ਉਦਯੋਗਾਂ ਦੀ ਕੋਈ ਚਿੰਤਾ ਨਹੀਂ ਹੈ। ਚੀਨ ਤੋਂ ਦਰਾਮਦ ਦਾ ਭਾਰਤ ਦੇ ਕਰੋੜਾਂ ਉਦਯੋਗਾਂ ‘ਤੇ ਸਿੱਧਾ ਅਸਰ ਪੈਂਦਾ ਹੈ। ਭਾਰਤ ਵਿੱਚ ਬਣਾਏ ਜਾ ਸਕਣ ਵਾਲੇ ਉਤਪਾਦ ਘੱਟ ਕੀਮਤ ਦੇ ਲਾਲਚ ਕਾਰਨ ਚੀਨ ਤੋਂ ਮੰਗਵਾਏ ਜਾ ਰਹੇ ਹਨ। ਅੰਡਰ ਬਿਲਿੰਗ ਤੋਂ ਲੈ ਕੇ ਹਵਾਲਾ ਘੁਟਾਲਿਆਂ ਤੱਕ, ਦਰਾਮਦਕਾਰਾਂ ਵੱਲੋਂ ਇਨ੍ਹਾਂ ਨੂੰ ਦਰਾਮਦ ਕਰਨ ਲਈ ਹਰ ਤਰ੍ਹਾਂ ਦੇ ਘਪਲੇ ਕੀਤੇ ਜਾਂਦੇ ਹਨ। ਇਸ ਦਰਾਮਦ ਕਾਰਨ ਭਾਰਤ ਦੇ ਕੱਪੜੇ, ਇਲੈਕਟ੍ਰਾਨਿਕ, ਸਾਈਕਲ, ਮਸ਼ੀਨ ਟੂਲ ਅਤੇ ਪਲਾਸਟਿਕ ਉਦਯੋਗ ਮੁਸ਼ਕਲ ਦੌਰ ਵਿੱਚੋਂ ਲੰਘ ਰਹੇ ਹਨ।
ਸਥਿਤੀ ਇਹ ਹੈ ਕਿ ਭਾਰਤ ਜੋ ਵਿਸ਼ਵ ਵਿੱਚ ਚਾਹ ਅਤੇ ਕੌਫੀ ਦਾ ਸਭ ਤੋਂ ਵੱਡਾ ਨਿਰਯਾਤਕ ਸੀ, ਹੁਣ ਚੀਨ ਤੋਂ 705 ਕਰੋੜ ਰੁਪਏ ਦੀ ਚਾਹ ਅਤੇ ਕੌਫੀ ਦੀ ਦਰਾਮਦ ਕਰ ਰਿਹਾ ਹੈ, ਜਦੋਂ ਕਿ ਪਿਛਲੇ ਸਾਲ ਇਹ ਅੰਕੜਾ 75 ਕਰੋੜ ਰੁਪਏ ਸੀ। ਰੰਗਾਂ ਦੀ ਦਰਾਮਦ 7770 ਕਰੋੜ ਰੁਪਏ, ਪਰਫਿਊਮ ਤੇ ਕਾਸਮੈਟਿਕਸ ਦੀ ਦਰਾਮਦ 3360 ਕਰੋੜ ਰੁਪਏ ਹੈ।
ਪਲਾਸਟਿਕ ਉਤਪਾਦਾਂ ਦੀ ਦਰਾਮਦ 46923 ਕਰੋੜ, ਕੱਪੜੇ, ਧਾਗੇ ਤੇ ਕੱਪੜਿਆਂ ਦੀ ਦਰਾਮਦ 30424 ਕਰੋੜ ਅਤੇ ਕੱਚ ਦੀ ਦਰਾਮਦ 19 ਫੀਸਦੀ ਵਧ ਕੇ 8600 ਕਰੋੜ ਨੂੰ ਪਾਰ ਕਰ ਗਈ ਹੈ। ਇਸੇ ਤਰ੍ਹਾਂ ਚੀਨ ਤੋਂ ਭਾਰਤ ਨੂੰ ਸਟੀਲ ਦੀ ਦਰਾਮਦ 16246 ਕਰੋੜ ਤੋਂ ਵੱਧ ਵਧ ਕੇ 22034 ਕਰੋੜ, ਤਾਂਬੇ ਦੀ ਦਰਾਮਦ 2642 ਕਰੋੜ ਤੋਂ ਵੱਧ ਕੇ 3265 ਕਰੋੜ, ਐਲੂਮੀਨੀਅਮ ਉਤਪਾਦਾਂ ਦੀ ਦਰਾਮਦ 11204 ਕਰੋੜ ਤੋਂ ਵੱਧ ਕੇ 12202 ਕਰੋੜ, ਕਟਲਰੀ ਦੀ ਦਰਾਮਦ 3960 ਕਰੋੜ ਤੋਂ ਵੱਧ ਕੇ 459 ਕਰੋੜ ਰੁਪਏ ਅਤੇ ਇਲੈਕਟ੍ਰਿਕ ਦੀ ਦਰਾਮਦ 459 ਕਰੋੜ ਹੋ ਗਈ ਹੈ। ਮਸ਼ੀਨਰੀ ਵਿੱਚ 40000 ਕਰੋੜ ਦਾ ਵਾਧਾ ਹੋਇਆ ਹੈ ਅਤੇ ਹੁਣ ਇਹ ਦਰਾਮਦ 259689 ਕਰੋੜ ਤੱਕ ਪਹੁੰਚ ਗਈ ਹੈ।
